Gwen niluwat og eo sa home quarantine
CEBU, Philippines – Niluwat og guidelines ang Kapitolyo alang sa pagpatuman sa home quarantine.
Matud ni Gob. Gwendolyn Garcia nga angay nga adunay han-ay nga guidelines sa home quarantine aron usab epektibo ang pagpakigbatok sa 2019 Novel Corona Virus-Acute Respiratory Disease.
“There are people nga medyo dili kaayo modawat anang home quarantine and that’s understandable kay wala may klarong protocol pero karon gihimo na ang proper procedure to ensure that inig isolate sa kaugalingong balay ang mga family members ma-protected sad,” matud ni Garcia. Ubos sa guidelines, ang lokal nga kagamhanan ang mo-monitor sa persons identified for home quarantine (PIHQ) kung gituman ba ang executive order sa gobernador. Pabutangan og tanod ug polis ang lugar aron mosusi kung ang PIHQ nagpabilin nga gi-isolate sulod sa panimalay. Ang kabanay sa PIHQ pahibaw-on sa guidelines ug precautions nga girekomendar sa Department of Health ug World Health Organizations sa pakighimamat sa PIHQ.
Hatagan sila og protective personal equipment sama sa facemasks, gloves, alcohol ug disinfectants.
Kagahapon atol sa tigum ni Garcia uban sa mga mayor, hepe sa kapolisan ug ubang personnel sa LGU, gibutyag ni Garcia nga adunay duha ka taga Liloan ang wala kauli sa ilang balay human wala makasubay sa kondisyon sa home quarantine ang ilang balay. Ang duha anaa karon sa Women and Children Development Center sa Lahug, Dakbayan sa Sugbo.
May taga San Remigio sab nga unang napaubos sa home quarantine sa ilang lungsod human nakapasar ang balay niini sa guidelines nga gi-set.
Samtang ang Barangay Poblacion Pardo sa Siyudad sa Sugbo aduna nay Barangay Health Emergency Response Team ug isolation room aron sa pagtabang sa gobiyerno sa pagtubag sa problema sa nCoV.Matud ni June Berongan, ang barangay administrator, nga ang ilang quarantine o isolation room adunay duha ka hospital beds, gloves, N95 masks ug disposable masks, goggles, nebulizer ug first aid kit.
Kini subay sa kamanduan sa Department of Interior and Local Government ug pagsanong sa awhag sa konseho sa dakbayan nga kinahanglan ang matag barangay adunay kaugalingon nga quarantine facility alang sa ilang mga residente nga gidudahang dunay nCoV. Rowena D. Capistrano/GMR (BANAT NEWS)
- Latest
