CEBU, Philippines — Gihangyo sa mga opisyal sa Barangay Inayawan ang kagamhanan sa Siyudad sa Sugbo alang sa rehabilitasyon ug pagmentinar sa F. Jaca Street ug White Road.
Ang transfer station alang sa nakolekta nga basura nahimutang sa Barangay Inayawan diin ang maong mga karsada ang gigamit sa mga sakyanan sa gobiyerno.
Si Attorney Kirk Bryan Repollo, barangay kapitan sa Inayawan, nipadala og suwat kang Cebu City Mayor Edgardo Labella nga naghangyo alang sa rehabilitasyon ug pag-aspalto sa mga karsada.
Matud ni Repollo nga tungod sa lainlaing klase sa mga sakyanan nga moagi sa dalan F. Jaca ug White Road matag adlaw hapit matag oras, dali ra nga naguba ang karsada.
“Since the transfer station is catering not just Barangay Inayawan but by Cebu City in general, it is incumbent that the roads leading to and from the transfer station should be maintained by the Cebu City Government,” matud ni Repollo.
Gipasabot ni Repollo nga ang pondo sa ilang barangay dili igo sa pagpaayo sa dalan kay daku kaayo ang gastuhanan.
Atol sa sesyon sa konseho sa siyudad niadtong Disyembre 11, gi-refer ang maong suwat ngadto sa Department of Engineering and Public Works (DEPW) sa Dakbayan sa Sugbo. /GMR (BANATNEWS)