Cebu, Philippines- Magtiayong gipasanginlang tigpayuhot og illegal nga drugas nadakpan atol sa buy-bust operation diha sa Sitio Crasher, Barangay Lawaan 3, Dakbayan sa Talisay kagahapon sa buntag.Ang subject sa operasyon mao si Isidro Olmillo Petiluna alyas Eddie, 47, nagpuyo sa maong dapit. Samtang ang iyang asawa nga giingong kauban niya sa maong negosyo mao si Maria Anna Empacis, 50, giapil sab sa pagdakop.
Ang managtiayon lumad nga taga Duljo Fatima sa Siyudad sa Sugbo. Laing nasikop mao ang gituohang mga drug users nga naatlan atol sa operasyon nga si Michael Dave Mopan Batarilan, 19, nagpuyo sa maong dapit.
Si Police Captain Mikhail Mallorca, deputy chief sa Talisay City Police Station nagkanayon nga pipila na ka semana nilang gi-monitor ang ilegal nga kalihukan sa magtiayon. Sa dihang nakahigayon na sila sa paghimo sa operasyon wa na nila kini gipalabay.
Nakuhaan og ilegal nga drugas ang mga dinakpan nga nitimbang og 20 gramos nga adunay balor nga P136 mil.
Si Konsehal Ledion Echavez sa Barangay Lawaan 3 nibutyag nga bag-o lang namuyo ang magtiayon sa ilang lugar nga kalit lang sab ang pagsaka sa ilang pagpuyo bisan paman og walay mga trabaho. Ang tulo ka dinakpan gibalhug sa bilangguan nga gikatakdang pasakaan og kaso.