Drug den gironda

CEBU, Philippines — Walo ka mga tawo ang nasikop sa gipahigayon nga buybust operation sa mga sakop sa Philippine Drug Enforcement Unit sa Barangay Alang-alang Dakbayan sa Mandaue nga niresulta sa pagkapuhag sa drug den sa lugar niadtong Biyernes sa gabii.

Ang mga  nasikop naila nga sila si Victor Canoy, 43, aircon technician ug maoy gitumbok nga nagpadagan sa maong drug den, Bienvenido Julius Cesar Serato, 50, Ronilo Loque-loque,35, Eric Dean Lagapa,31, Jennifer Jubay, Fritz Adrian Sinoy, 33, Jomarc Cabreros,22, ug Arnel Cabrerod,37.

Ang mga nadakpan gawas ni Canoy giingong pulos bisita sa maong drug den kay silang tanan dili mga residente sa maong lugar.

Nasakmit gikan sa mga dinakpan ang 77 ka putos nga gituohang ginadili nga drugas nga mobalor og P184 mil , drug paraphernalia, duha ka cellphones, cash nga moabot dul-an P1,5000.

Ang mga tinugyanan sa PDEA7 nakadawat impormasyon may kalabotan sa pagpamaligya og illegal nga drugas ni Canoy hinungdan sa gilusad nga operasyon.

Sa pikas bahin, gipatabang sa kapolisan sa Consolacion ang mga priso sa bilanggoan sa lungsod sa gipalapdang kampanya kontra illegal nga drugas.

Kini pinaagi sa pagpatabang kanila pagpamutos sa gitawag nga “Lollicops,” candies kini nga ipanghatag sa mga polis ngadto sa mga batang nakatambong sa ileng drug awareness campaign sa lungsod.

Ang matag lollipop gipasukipan og mensahe gikan sa mga piniriso sa lungsod sa Consolacion diin nagawhag sa kabataan nga dili magpatintal paggamit sa illegal nga drugas nga dunay pasidaang  naa sa uwahi ang pagbasol.

Ang mga priso nga nitabang mga buhing saksi sa kabangis sa illegal nga drugas nga maoy nakaingon nga naa sila karon sa prisohan. Malaumon ang kapolisan nga pinaagi sa ilang tabang isip nakasuway na niini, mas magtimaan ang mga kabataan nga likayan ang illegal nga drugas.

Niadtong adlaw nga Biyernes, gibisita sa kapolisan sa Consolacion ang Danglag Elementary School diin gawas sa pagseminar sa mga bata kabahin sa paglikay sa ginadiling drugas, nag-story telling sab sila kabahin sa Good Manners and Right Conduct.

Ang hepe sa Public Community Relations (PCR) ug tigpamaba sab sa Cebu Provincial Police Office nga si Police Lieutenant Colonel Virgilio Bayon-on nalipay sa maong programa sanglit mas mapaduol ang kabataan ngadto sa kapolisan.

Ang maong proyekto gipangulohan sa bag-ong hepe sa Consolacion nga si Police Major Verniño Noserale.

Sa wala pa nahimong hepe sa Consolacion si Noserale, siya maoy hepe sa Minglanilla Police Station diin didto nagsugod ang maong proyekto. (Camille Pateres/IBM)(BANATNEWS)