CEBU, Philippines — Mapasigarbuhong gidawat ni outgoing Mandaue City Vice Mayor Carlo Fortuna ang pasidungog nga gihatag sa Department of Interior and Local Government (DILG) ug sa Philippine Councilors Legue.
Kini nag-ila isip finalist sa Local Legislative Award of Excellent sa mga highly urbanized cities.
Si Fortuna uban sa mga sakop sa konseho sa dakbayan ang nakadawat og Award of Recognition niadtong Hunyo 19 atol sa 2019 End Term National Assembly sa PCL nga gipahigayon sa Dakbayan sa Sugbo.
Hinuon wala naangkon sa mga sakop sa konseho sa Dakbayan sa Mandaue ang kadaugan sa tibuok nasud nga indigay sanglit ang Sangguniang Panlungsod sa Dakbayan sa Quezon nga gipangulohan ni Bise Mayor Joy Belmonte mao man ang nakalangkat sa kadaugan.
Nagpasalamat gihapon si Fortuna ug kaubanan sanglit garbo na man kaayo sa Mandaue City Council nga nakaabot sila sa nasudnong panagtigi.
Niadtong Disyembre 2018, ang Dakbayan sa Mandaue maoy nidaug sa tibuok Central Visayas nga indigay hinungdan nga lakip sila sa 12 nga mga highly urbanized cities nga kategoriya. (/GMR)(BANATNEWS)