Engkwentro sa San Fernando

CEBU, Philippines – Upat ka mga lalaki ang nasikop atol sa sinukliay ug bala tali sa mga tinugyanan sa militar, kapulisan ug armadong grupo sa barangay Bugho, bukiran nga bahin sa lungsod sa San Fernando kagahapon sa hapon.

Ang mga nasikop mao sila si Romeo Olis, Manuel Alidon, Anastacio Solis, ug Prisco Tapales.

Matud pa ni Police Major Lymel John Pasquin, hepe sa San Fernando Police Station dunay nitawag kanila ug nipahibalo bahin sa mga armadong lalaki sa maong barangay hinungdan gipahibalo usab nila ang militar nga nagpatrolya sa kabukiran.

Dali sab nga giparesponde  ni Pasquin ang iyang mga sakop nga naa BADAC  meeting duol sa dapit.

Dugang pa ni Pasquin sa pag-abot sa mga militar sa lugar giingong gipabuthan dayon sila sa maong armadong lalaki hinungdan sa sinukliay sa bala sulod sa pipila ka segundos.

Atol sa ginukdanay nasikop nila ang duha nga nakuhaan og .357 magnum nga armas, bala, samtang ang laing duha nga giingong namusil sa mga sundalo nadakpan apan wala nakuhai og armas kay gituohang gilabay kini atol sa dinaganay.

Matud ni Pasquin, ang maong barangay naa sa utlanan sa San Fernando ug Pinamungahan.

Tanang mga anggulo gitan-aw sa kapulisan  apil na ang kalambigitan sa politika. Gibutyag ni Pasquin, ning nagsingabot ang eleksyon mas pahugtan pa nila ang presensya sa kapulisan diha sa ilang lungsod

Si Barangay Councilor Teodoro Resogento, kinsa modagan pagka konsehal sa lungsod ubos sa partido ni Mayor Lakambini “Neneth” Reluya nitug-an alas-10 sa buntag  nakabantay silang dunay daghang magmotor nga mag-agi agi sa ilang barangay.

Wala lang nila panumbalinga tungod kay ang kaatbang nila aduna may ipahigayon nga rally sa ilang dapit, apan nahibulong siya nga mohunong man sa ilang atubangan sa balay ug magtan-aw tan-aw diha sa sud maong nitawag sila og polis.

Sumala pa ni Resogento, dako iyang pagtuo nga politika ang nagpaluyo niini ug nag-ampo nga dili biyaan sa kapulisan ug militar ang ilang lugar alang sa ilang seguridad. (/IBM)(BANAT NEWS)