Lahugay sa Comelec ugma na

CEBU, Philippines – Karong adlawa na ang lahugay sa mga election officers sa Commission on Elections (Comelec) isip kabahin sa pagpangandam sa umaabot nga National ug Local Election sa Mayo 13, 2019.

Matud ni Comelec Cebu City North District Election Officer Atty. Marchel Sarno ang pagpangandam nga ilang gihimo mao ang pagkuha sa tanang dokumento ilabi na kadtong mga accountables sama sa equipment ug uban pa nga may labot sa eleksiyon aron ilang i-turn over sa mopuli kanila.

Nasayran nga si Atty. Sarno ibalhin sa Cebu City South District ug ang mopuli kaniya mao si Atty. Chauncey Boholst and election officer sa Carcar City, samtang si Atty. Edwin Cadungog gikan sa South District ibalhin sa Mandaue City ug si Atty. Anna Fleur Gujilde gikan sa Mandaue ibalhin sa Naga City.

Matud ni Sarno mao sab kini ang gihimo sa ubang mga election officers karon.

Asoy niya nga ‘partially’ nahuman na ang training sa electoral board, sanglit mopahigayon paman sila og final training ug instructions kay basin unya adunay kausaban sa resolution sa Comelec.

Makig-alayon sab sila sa kapolisan ug treasurer’s office mahitungod sa security kon unsaon nila pag-deliver sa mga balota, election paraphernalia ug uban pa.

Posible nga moabot sa Sugbo ang election paraphernalia sa buwan sa Abril o Mayo, apan gihimug-atan ni Sarno nga mag-depende kini sa election paraphernalia, kay kon non-accountables, sayo kini maabot apan kon mga accountables sama sa balota hayan maabot kini kanang duol na ang eleksiyon. (BANAT NEWS)