CEBU, Philippines – Ang Comelec sa Probinsiya sa Sugbo nagplano sa pagbutang og polis o military matag presinto sa Lungsod sa San Fernando karong eleksiyon sa buwan sa Mayo.
Kini aron sa pagsiguro sa pagmentinar sa kahusay ug kalinaw atol sa piniliay sa maong lungsod.
Si Atty. Jerome Brillantes, provincial election supervisor nagkanayon nga personal siya nga nibisita sa Lungsod sa San Fernando ug naminaw sa rason sa mga magtutudlo nga nibalibad nga moserbisyo karong piniliay.
Gibutyag ni Brillantes nga ang mga magtutudlo nabalaka sa ilang seguridad atol sa piniliay ug ang 27 ka maestra ilaha na usab kining nahulipan.
Si Brillantes nipasalig sa tanang moserbisyo nga hatagan og saktong pwersa aron makapanalipod kanila kon ugaling adunay mga daotang panghitabo panahon sa piniliay.
Si Brillantes nagkanayon nga butangan nila og duha ka polis matag classroom o presinto.
Sa nasayran, ang lungsod sa San Fernando maoy gitutokan karon gumikan sa mga nangamatay nga opisyales sa lungsod.
Kini ilabi na nga ang bana ni Mayor Lakambini “Neneth” Reluya nga si Ricardo Reluya,Jr. nalakip sa namatay human sila gibanhigan. (/BDB)(BANAT NEWS)