^

Tindero’g utanon nakuhaag P2M shabu

Raymond D. Abarcas (Banat) - January 14, 2019 - 12:00am

CEBU, Philippines — Mokabat P2 milyones kapin nga balor sa gidudahang shabu ang nasakmit gikan sa tindero og utanon atol sa buy bust operation nga gipahigayon sa mga tinugyanan sa Pardo Police Station sa may Sitio Kauswagan, Barangay Basak Pardo, Cebu City niadtong Domingo sa kaadlawon.

Ang nasikop mao si Elvie Peter Mandreza, 31, wala malakip sa watchlist, adunay kapuyo ug tindero og utanon nga residente sa maong lugar.

Ang kapulisan sa Pardo Police Station kauban ang Drug Enforcement Unit  nilusad sa maong operasyon base sa impormasyon nga ilang nadawat bahin sa pagpamaligya niini og drugas.

Matud pa ni Police Officer 3 Benjamin Maglajos, imbestigador sa Pardo Police Station 310 gramos nga gidudahang shabu ang ilang nakuha gikan sa suspek. Apil sa nakuha gikan kaniya ang budol money ug sling bag nga gisudlan sa ginadili nga drugas.

Ang suspek nagdumili pagtubag sa Banat News dihang gikuhaan og pamahayag. (Rowena D. Capistrano/IBM)

Landfill sa Toledo regklamo

Nangreklamo karon ang mga residente sa duha ka barangay sa Dakbayan sa Toledo tungod sa matud pa grabe kadaghang langaw, hugaw nga tubig ug nagpasad nga basura nga gituhoan nilang gikan sa sanitary landfill sa Barangay Putingbato bukiran nga bahin sa nahisgutang siyudad. Ang mga residente gikan sa Barangay Putingbato ug Canlumampao ang naapektuhan sa basura sa nahisgutang landfill. Usa ka residente sa barangay Putingbato nga wala nagpaila ang nireklamo sa Banat News baho ang inagas sa tubig gikan sa maong basurahan nga ilang mahanggab kada adlaw.

Midaghan usab ang langaw nga motugdon sa ilang mga pagkaon nga gituohang gikan sa maong basurahan.

Laing residente usab ang nasagmuyo kay ang iyang gipabuhat nga tanke sa tubig wala na mapusli sanglit ang tubig nga ilang nakuha adunay di maayong baho baho ug itom na ang kolor ug nagduda kining tungod kini sa tinuhop nga duga sa basura sa maong landfill. Gani nigasto siya og dul-an sa P90 mil sa pagbuhat sa maong tinubdan sa tubig apan dili na kini mapahismulan.

Samtang ang mga mag-uuma usab sa Barangay Canlumampao nangreklamo human ang tubig gikan sa basurahan niabot na sa tinubdan sa tubig nga gamiton nila pagpahumok sa yuta sa ilang kahumayan.Usa ka Manuel Cuizon sa Barangay Canlumampao ang nireklamo nga mangatol na sila matag makaubog sa tubig sa ilang humayan nga wala nila masinati kaniadto sa wala pa ang maong landfill.

Si Eduardo Alicaba kanhi kapitan sa maong barangay ug maoy lider sa hugpong sa mga mag-uuma sa ilang barangay nagkanayon nga gibana-bana moabot sa 100 ka ektarya sa yuta nga humayan ang naapektuhan sa hugaw nga tubig gikan sa inagos sa landfill.

Moabot sa 200 ka ektarya sa humayan ang katamnan unta og humay apan 20 niini ang wala magamit tungod dili na ganahan ang mga mag-uuma sa kahadlok nga makabaton og sakit sa panit.Samtang si Konsehal Shirly Mabida sa maong barangay Canlumampao ug tsirman sa committee on Solid Waste Management sa ilang barangay  miingon nga ila nang gipadangat sa City Environment and Natural Resources Office CENRO Toledo ang problema.

Giingong misaad ang CENRO nga ilang pangitaan og paagi nga masulbad ang maong problema apan hangtod karon wala pa makadawat og kalambuan sa pagtarong sa maong landfill.

Ang Banat News misuway pagkuha og komento sa CENRO apan way nanubag sa ilang buhatan. Sa pakighinabi sa Banat News kang Barangay Kapitan Irene Gerale sa Barangay Canlumampao nagkanayon kini nga problema sa iyang barangay ang inagos nga tubig gikan sa maong landfill.

Gani adunay 4,000 ka mga residente sa barangay  ang naapektuhan sa maong hugaw nga tubig tungod kay ang tubig sa ilang mga poso  nabalaka silang dili na mainom. Dugang sa kapitan nga hasta ang mga hayopan sama sa baka ug kabaw ang dili na molunang sa sapa sa ilang dapit. Nanawagan usab ang kapitan sa kadagkuan sa kagamhanan sa Toledo nga mahatagan og pagtagad og kasulbaran ang maong problema. (BANAT NEWS)

ELVIE PETER MANDREZA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with