Beauty pageant candidates ipa-drug test

CEBU, Philippines – Tungod sa pagkalambigit sa usa ka kanhi beauty queen contestant sa illegal drug trade, nisugyot si Bise Gobernador Agnes Magpale nga ipaubos na sa background check ug drug testing ang mga kandidatang mosalmot sa mga beauty pageants sa Sugbo.

Niadtong Sabado ang usa ka kanhi kandidata sa Bb. Cebu nga si Teri Colmenares nadakpan sa buy bust operations sa kapolisan sa Cebu City human nakuhaan og ‘kush weeds.’ Nabalaka si Magpale sa nadangatan sa maong kanhi beauty queen kay matud pa niya, ang usa ka kandidata sa mga ingon niini nga indigay kinahanglang makapakita kun unsa ang tinuod nga kinaiya sa Pilipina. Matud niya, dili lang sa pisikal nga hulagway o kaanyag kondili apil na ang ilang kinaiya ug gidak-an. Mahibaw-an lang kini pinaagi sa background checking. Sa bag-ohay lang gihimo nga proyekto sa Provincial Women’s Commission (PWC) atol sa pagpahigayon niini nga Renaissance Cebuana, ang tanang gipiliang kandidata gipaubos sa background check.  Matod ni Magpale gilambigit nila ang National Bureau of Investigation (NBI) atol sa screening.  Nakita usab sa bise gobernador nga mas labing maayo kung mapaubos og drug test.

“Yes (pagpaubos sa drug test),  if they will submit. Drug test and background check,” matud ni Magpale.

Samtang nipadangat usab og kalipay ug pag- congratulate si Magpale sa pagpili kang Catriona Gray nga maoy nakadaog isip 2018 Miss Universe nga gihimo kagahapon didto sa Bangkok, Thailand.

Sa pikas bahin, gipasakaan og kaso kagahapon si Colmenares tungod sa pagbaligya ug paghupot niini og ilegal nga drugas. Sumala pa sa hepe sa Guadalupe Police station nga si Police Senior Inspector Dexter Basirgo ang chemistry laboratory result nagpakita nga positibong nga kush weed ang nasakmit gikan sa maong kanhi beauty queen.

Ang direktor sa Cebu City Police Office nga si  Police Senior Supt. Royina Garma nagkanayon nga ipresentar nila sa korte ang cellphone sa suspek isip usa sa mga ebidensya.

Mangayo sila og court order aron nga mautingkay ang mga contacts niini diin posibleng usa niini maoy tinubdan niini sa maong drugas. “Ayaw magsalita pero yung phone niya may password, we cannot actually search kailangan may court order,” miingon si Garma.

Si Colmenares ang gitumbok sa usa ka Nicole Allan Casiño nga maoy tinubdan niya sa kush weed.

Si Casiño, usa ka engineering student sa usa sa mga dakong unibersidad dinhi maoy unang nadakpan sa buy bust operation human siya mao say gitumbok nga tinubdan sa lysergic acid diethylamide (LSD) nga gigamit sa usa ka lalaki sa paglugos niini og usa ka dalaga. Nakuhaan sab si Casiño ug mga kush weed sa buwag nga buy bust operation.

Nasayran nga gipadayag sa tigpamaba sa ahensya sa Philippine Drug Enforcement Agency-7 nga si Leia Albiar-Alcantara nga gipalusot gikan sa gawas sa nasud ang maong mga kush weed sanglit walay manubo niini diri sa Pilipinas nunot sa klase sa klima.(/IBM)(BANAT NEWS)