Liboan niapil sa Walk with Mary
CEBU, Philippines — Liboan ka tawo ug 27 ka karosa sa imahen ni Birhen Maria sa nagkalainlaing titulo gikan sa mga nagkadaiyang parokya ang niapil sa prosisyon kagahapon sa buntag.
Ang maong prosisyon nanukad diha sa Fuente Osmeña Rotunda padulong sa Cebu Metropolitan Cathedral nga gipangulohan ni Archbishop Jose Palma sa Archdiocese of Cebu.
Alas 4:00 sa kadlawon gisugdan ang prosisyon sa mga karosa ug gitapos kini sa usa ka Santos nga Misa.
Matud ni Palma nga dako og papel ang Mahal nga Birhen ngadto sa katawhan tungod kay kanunay kining nakig-uban bisan taliwala sa mga problema nga ilang giatubang.
Ug tungod sa pagpangga ni Birhen Maria daghang nindot nga butang ang natagamtaman sa katawhan hinungdan nga malaumon siya nga buksan sa katawhan ang ilang kasing-kasing, ilang banay ug ilang pamilya alang kang Mama Mary.
Matud usab ni Palma nga sayod siya nga daghang pagsuway sa kinabuhi ug kinahanglang moduol lang sila kang Mama Mary tungod kay anaa gyud kanunay ang grasya.
"Bisan sa mga kakapoy sa atong panaw dili kita biyaan sa atong inahan and Mama Mary will carry us," ni Palma pa.
Human sa Santos nga Misa gisunod ang paghalad sa mga bulak alang kang Mama Mary. Kadaghanan sa mga deboto ni Birhen Maria susama lang og pamahayag ang pagpasalamat sa mga grasya nga nadawat ug gasa sa maayong panglawas ug ang kalinaw sa nasud. (/BDB)(BANATNEWS)
- Latest
