CEBU, Philippines – Gisaway ni Konsehal Raymond Alvin Garcia sa Barug Team Rama si Mayor Tomas Osmeña gumikan sa pag-rescue niini sa tulo ka butane vendor nga gidakop sa kapolisan sa Pari-an Police Station.
Matud ni Garcia nga ang mayor walay pagtahod sa balaod gumikan sa paggamit niini sa iyang gahum aron buhian ang mga nakalapas sa balaod.
Gihulagway ni Garcia nga “unusual” sa usa ka public official ang giingong pag-rescue sa nakalapas sa balaod.
Niadtong Agosto 24, ang Pari-an Police Station nakasikop og tulo ka manindahay gumikan sa pag-refill og butane canister og liquefied petroleum gas diha sa Barangay T. Padilla, niining siyudad.
Ang mga nasikop mao sila si Ramir Amaca, taga Mandaue City, Romeo Appareca ug Romeo Cuevas nga pulos taga Dakbayan sa Sugbo.
Apan giingong si Osmeña nimando sa duty nga polis niadtong tungura nga siya maoy mo kustodiya sa tulo ka dinakpan.
Si Garcia kinsa usa ka abogado nihulagway nga ang gihimo ni Osmeña usa ka obstruction of justice. (/BDB)(BANAT NEWS)