CEBU, Philippines — Usa ka 30-anyos nga lalaki ang napusilan patay human misukol og pinusilay sa mga polis nga modakop kaniya human siya nalutsan og warrant of arrest sa kasong frustrated murder kagahapon sa buntag diha sa barangay Mangdilikit, lungsod sa Argao.
Giila sa Argao Police Station ang nakalas mao si Dennis Pia Artiaga, residente sa maong dapit.
Matud ni Chief Inspector Rovic Villarin ang Regional Mobile Force Battalion-7 (RMFB7) mao ang mihatud sa warrant gikan ni Judge Maximu Perez sa Regional Trial Court Branch 26 sa Argao.
Apan pag-abot didto gipusil sila ni Artiaga gamit ang paltik 38 revolver hinungdan nga ilang gibawsan.
Dali siyang gidala ngadto sa Isidro C. Kintanar Memorial Hospital apan namatay kini. (BANAT NEWS)