ABC President sa Mandaue nasublian

CEBU, Philippines — Higpit ang panag-atbang sa mga kandidato alang sa pagka Association of Barangay Council  (ABC) sa Dakbayan sa Mandaue apan nasublian gihapon sa iyang posisyon si Subangdaku Barangay Kapitan Ernie Manatad.

Iyang gikaatbang si Barangay  Kapitan Gregorio Yap  sa Barangay Banilad sa maong dakbayan.

Bisan kon giingon nga non- partisan ang mga barangay kapitan apan sa gihapon wala matago ang suporta sa mga dagkong politiko  sa dakbayan nga naglakip nila ni Mayor Gabriel Luigi  Quisumbing ug  6th  District Congressman  Jonas Cortes. Si Manatad sa Subangdaku giingon nga gisuportahan ni Cortes ug gihuhungihong usab nga si Yap mao ang gisuportahan usab ni Quisumbing.

Si Quisumbing ug si Cortes gihugonhugonan na nga maoy mag-atbang unya sa mid-term elections sa pagkamayor sa sunod tuig. Sa pikas bahin didto sa Lapu-Lapu City, way kontra sa pagka ABC si Bankal Barangay Kapitan Eduardo Cuizon. Ang Lapu-Lapu adunay 30 ka mga barangay apan 25 lang ang nitunga alang sa pagbotar. Silang tanan mibotar kang Cuizon. Di na hinuon bag-o kang Cuizon ang maong posisyon tungod kay siya man ang ABC federation president sa panahon sa administrasyon ni kanhi Lapu-Lapu City Mayor Arturo Boy Radaza, bana sa kasamtangang mayor. (BANAT NEWS)