Balay paabangan sa Toledo nasunog

CEBU, Philippines – Mokabat sa P250 mil ang danyos sa sunog sa Barangay Ibo, Dakbayan sa Toledo kagahapon sa buntag.

Nasayran nga balay paabangan ug residential houses ang gilamoy sa kayo alas 9:30 kagahapon sa buntag. Gipanag-iya sa usa ka Dennis Pahaganas ang naugdaw nga balay paabangan.

Matud ni Fire Senior Inspector Paul Patrick Laude, hepe sa Bureau of Fire Protection sa Dakbayan sa Toledo, nga niabot sa kapin sa usa ka oras ang pagpawong sa kayo.

Lakip sa niresponde ang mga bombero sa kasikbit nga Lungsod sa Pinamungajan ug pipila ka bombero sa pribadong kompaniya sa dakyanan. Giimbestigar pa ang hinungdan sa sunog samtang walay naangol nga mga tawo atol sa sunog.

Sa laing bahin, nagpabilin gihapon sa covered court sa Sitio Biking, Mambaling, Dakbayan sa Sugbo ang mga biktima sa sunog sa Sitio Pagatpat niadtong Hunyo 30 samtang pipila ka bata nangasakit na.

Ang 24 ka pamilya nagguol na tungod kay wala pay kasegurohan nga mahatagan sila og relocation site sa kagamhanan.

Ang Barangay Mambaling nga gipangulohan ni Kapitan Wilfredo Go nitabang sa paghatag og medical assistance sa mga biktima pinaagi sa health center.

Si Genevive Alcoseba, head of operations sa Cebu City Division for the Welfare of the Urban Poor, niingon nga ang mga biktima pangitaan pa og relocation site.

Iya hinoon gidasig ang mga hingtungdan nga tabangan ang lokal nga kagamhanan sa siyudad sa pagpangita og relocation site aron madali ang proseso.

Ang Department of Social Welfare and Services nisuporta sab sa mga biktima pinaagi sa paghatag og hinabang sama sa disaster kits, pagkaon, butane, mga gamit pangluto ug banig apan nahunong na hinungdan sa ilang kabalaka sanglit ang financial assistance wala pa niabot.

Hinoon gipasalig sa DSWS nga ang budget para sa mga nasunogan ang mahatag gyud diin tag P20,000 sa mga tag-iya sa balay, P10,000 sa mga nangipon o nag-abang lang sa balay. (Richel Ann Basiga/GMR)(BANAT NEWS)