PNP: ‘Zero crime’ atol sa Pacquiao-Matthysse fight
CEBU, Philippines — Sama sa gipaabot, malinawon ang Metro Cebu ug ang Probinsya sa Sugbo atol sa away ni Senador Manny Pacquiao batok sa Argentinian WBA Welterweight champion nga si Lucas Matthysse nga iyang gihuboan sa bakos kagahapong adlawa.
Sa Dakbayan sa Sugbo, daw nahipos ang mga tawo kay adto nitutok sa telebisyon ug mga establisamentong dunay pay-per-view.
Sumala pa sa direktor sa Cebu City Police Office nga si Police Senior Supt. Royina Garma nga wala silay natala nga insidente gikan sa 11 ka mga estasyonan sa polis sa dakbayan atol sa away ni Pacquiao. Samtang ang direktor sab sa Cebu Provincial Police Office nga si Senior Supt. Manuel Javier Abrugena nagkanayon nga nagmalinawon sab ang probinsya.
"So far mam wala po significant incident natatanggap pa," si Abrugena nagkanayon.
Sa wala pa magsugod ang away ni Pacquiao kagahapon, gipasidan-an na ni Garma daan ang mga polis sa dakbayan nga magpabilin sa ilang pagtrabaho ilabi na sa kadtong magpatrolya.
"Yung mga polis natin hindi nanunuod ng Pacquiao. Mag-iikot pa rin sila to make sure ‘yung mga manunood ng Pacquiao ay di mabiktima ng krimen," si Garma nagkanayon.
Samtang sa Dakbayan sa Talisay, malinawon usab ang siyudad sa samang mga takna.
Si SPO1 Jason del Campo sa Talisay City Police nibutyag nga wala’y bisan usa nga nitawag o nidangop sa ilang buhatan aron sa pagpangayo og police assistance atol sa oras nga nagsinukliay na sa kinumo ang duha ka boksidor didto sa Kuala Lumpur, Malaysia. (BANAT NEWS)
- Latest
