CEBU, Philippines — Dul-an sa 200 ka kaso sa hemophilia sa Central Visayas kini base sa datos sa Hemophilia Association of the Philippines, Inc. niadtong Disyembre 2017.
Giingong ang 120 niini gikan sa probinsiya sa Sugbo lakip ang Mactan Island, dakbayan sa Danao, lungsod sa Tuburan, lungsod sa Argao, dakbayan sa Carcar ug Talisay.
Gibana-bana nga 60 ngadto sa 80 ka pasyente nga naay sakit nga hemophilia ang dili taga Cebu.
Gibutyag ni Edwardson Co, kinsa usa ka pasyente ug social worker sa Hemophilia Association of the Philippines, Inc. nga uban nga pasyente nga ilang naatiman nga dunay hemophilia naggikan sa probinsiya sa Siquijor, Bohol, Leyte ug Zamboanga.
Gipasabot ni Co nga ang hemophilia dili “deadly” nga sakit sama sa cancer.
Ang hemophilia usa ka sakit sa tawo nga iyang pagadad-on sa tibuok niyang kinabuhi tungod sa depekto sa pagbagtok sa dugo hinungdan nga dugay moundang ang pag-agas sa dugo kong masamaran, mabun-og ug bisan wala’y hinungdan.
Ang hemophilia dala na kini sa pagkatawo diin napasa kini sa ginikanan ngadto sa iyang anak apan usahay ang hemophilia mahitabo bisan dili kaliwat sa pamilya ug kini ang gitawag nga "Sporadic Hemophilia" (wala damha nga hemophilia).
Gibana-bana nga 30 porsiyento sa tawo nga dunay hemophilia wala niya kini masunod sa iyang mga ginikanan naangkon niya kini tungod sa pagbag-o sa iyang kaugalingon nga kinaiya (genes).
Ang naandan nga sintomas sa hemophilia mao ang pagdugo sa mga lutahan o unod diin mabantayan kini kung dunay ngulngol ug rayuma.
Wala pa’y nahibaloan nga tambal ang hemophilia apan ang sakto nga nutrisyon ug healthy lifestyle makatabang batok sa hemophilia o malikayan ang pagdugo. (Mary Rose S. Sagarino, CNU Intern/BDB) (BANAT NEWS)