High value targets sikop
CEBU, Philippines — Mokabat og P377,600 balor sa shabu ang nasakmit atol sa duha ka managlahing buy- bust operations sa Barangay Basak Pardo, Dakbayan sa Sugbo niadtong Sabado sa gabii ug sa Barangay Tejero kagahapon sa hapon.
Nadakpan sa Basak Pardo si Erik Glenn Villacorta, 34, kinsa giingong usa ka high value target sa Pardo Police Station.
Nakuha gikan kaniya ang upat ka gagmay’ng pakete ug ang usa ka dakong pakete sa gidudahang shabu nga moabot tanan ang kantidad og P295 mil.
Samtang didto sa Villagonzalo Dos, Barangay Tejero, nadakpan si Kashmir Florita Temple alyas Em-Em, 36.
Nakuha sa mga operatiba sa Drug Enforcement Unit ang usa ka gamay ug duha ka medium nga mga pakete sa gituohang shabu. Sigun pa ni Senior Insp. Joemar Pomarejos, hepe sa Waterfront Police Station nakadawat sila og impormasyon nga namaligya og drogas ang suspek maong gilusad ang operasyon.
Motimbang kini og siyete ka gramos ug mobalor na og P82,600.
Samtang usa ka level 2 drug pusher sa dakbayan sa Talisay nga si Janet Cabriana, 52, taga Sitio Hawod, Barangay Bulacao nasikop pinasikad sa warrant of arrest nga giluwtan sa korte.
Sila si Supt. Marlu Conag, pangu sa kapulisan sa dakbayan niingon nga nakadawat sila og impormasyon nga diha ra magtago sa lugar si Cabriana kinsa adunay warrant of arrest gikan ni Judge Glenda Go sa Regional Trial Court (RTC) branch 65 tungod sa kaso sa ilegal nga drugas. Matud pa ni Conag nga taud-taud na nga nagtago-tago si Cabriana. (BANAT NEWS)
- Latest
