CEBU, Philippines — Mopalit ba o mokuha og pribadong towing company ang Siyudad sa Talisay aron maoy moguyod sa mga sakyanan nga pataka lang og parking o mga maaberiya diha sa kadalanan.
Kini maoy gipahibawo ni retired general Cecil Ezra Sandalo, consultant ni Mayor Eduardo Gullas sa peace and order.
Hinuon si Sandalo niingon nga naa pa kini sa ilang diskusyon kun hain makadaginot ang siyudad.
Siya nagkanayon nga mao kini ang bugtong tubag nga madali ra ang pag-iway sa mga sakyanan nga madisgrasya diha sa kadalanan nga makamugna dayon sa grabeng trapiko.
Ang kadagkuan nagplano nga mokuha sa serbisyo sa pribadong towing company diin igo na lang modawat ang siyudad sa bahin sa kita base sa masabutan. (GMR) (BANAT NEWS)