Mananagat nakatulog nalumos
CEBU, Philippines — Usa ka mananagat nalumos human kini nakatulog sa bangka nga iyang gisakyan dihang nanagat kini diha sa kadagatan sa Barangay Calajoan, lungsod sa Minglanilla.
Ang maong insidente nahitabo niadtong Miyerkules sa hapon apan ang patay’ng lawas ni Felipe Repunte, 55-anyos, molupyo sa Sitio Lower, Barangay Pakigne sa maong lungsod napalgan sa laing mananagat niadto nang adlaw’ng Biyernes.
Si PO3 Alfredo Pagaling sa Minglanilla Police Station mibutyag nga si Danilo Selma ug Nestor Espra kadungan nga nanagat ni Repunte.
Giingong nabantayan sa duha ka mananagat si Repunte nga nakatulog hinungdan nga ilaha kining gitawag aron makamata apan posibleng wala makadungog si Repunte tungod kay 15 metros ang ilang distansiya gikan sa bangka niini.
Si Repunte giingong natagak gikan sa bangka hinungdang daling gilangoy nila ni Selma ug Espra aron luwason apan wala na nila kini makita.
Ang kapitan sa Baranggay Calajoan, Loneto Balorio nagpahigayon og search and rescue operation apan wala gihapon makit-i si Repunte.
Laing mananagat nga si Dennis Selma ang nakakaplag sa patay’ng lawas ni Repunte nga naglutaw-lutaw sa dagat niadtong Biyernes sa buntag. (BANAT NEWS)
- Latest
