Nilabay og basura gidunggab patay

CEBU, Philippines — Tungod lang sa basura gipatay sa amahan ug anak ang ilang silingan sa Caduldulan, Barangay Lawaan 3, Dakbayan sa Talisay kagahapon sa ala 1:15 sa kadlawon.

Ang biktima mao si Reosyl Dela Fuente, 33-anyos, empleyado sa woodcraft nga nagpuyo sa maong lugar.

Ang mga suspek mao sila si Lito Madaya, 55, ug anak nga si Yanyan Madaya, 20, pulos mangargahay og isda sa Tabunok Public Market.

Si PO2 Edwin Campomanes, imbestigador sa Talisay City Police Station, niingon nga sa sayo pa nakainom nang daan ang biktima ug nakiglalis ni Annabel Jabone, ang kapuyo ni Lito.

Ang ilang gilalisan mao ang paglabay sa biktima sa sako sa basura sa ilang kanal nga nisubay ngadto sa kanal sa mga suspek.

Gumikan sa ilang panaglalis gihusay sila sa barangay. Niabot ang tungang gabii nakadungog si Yanyan sa maong hitabo hinungdan nga giatngan na niya’ng daan ang biktima.

Sa pag-agi gyud sa biktima iya kining gibunalan og botelya hinungdan nga nahagsa sa yuta dayon nahitabo ang komosyon.

Nakadungog ang amahan ni Yanyan hinungdan nga nigawas kini nga nagbitbit og kutsilyo dayong hansak sa wala’ng lusong-lusong sa biktima.

Nakadagan pa ang biktima apan nisukarap ra pud kini dili layo sa lugar nga siya nadunggaban. Ang amahan ug anak nga suspek ang dali nga nisibat sa lugar.

Gidala sa Talisay City Hospital ang biktima apan gideklarar kini nga dead on arrival.

Matud ni Campomanes nga bisan sa ilang pagsubay sa lugar nga gigikanan ni Lito wala na kini didto. Bisan pa man ila nang giandam ang kaso nga ipasaka batok sa duha ka suspek. (BANAT NEWS)