CEBU, Philippines — Nasikop ang usa ka Koreano kinsa dunay kasong syndicated estafa ug qualified theft niadtong Biyernes.
Ang dinakpan giila nga si Park Jung Kwan, 46-anyos, walo na ka tuig nagpuyo sa Dakbayan sa Sugbo.
Matud pa sa regional director sa National Bureau of Investigation sa Central Visayas, Atty. Patricio Bernales Jr., nga niadto pang 2014 ang maong warrant of arrest nga giluwatan sa Regional Trial Court Branch 23 sa Dakbayan sa Sugbo.
Dugang gibutyag ni Bernales mao ang pagkalambigit sa maguwang sa dinakpan nga si Park Jung Ho nga padayon pang gipangita ug ang laing tulo ka Pinoy nga nalambigit sa maong kaso.
Gitataw sa direktor nga wala sila nasayud sa modus sa dinakpan sanglit sila lang ang nag-aresto niini apan gibutyag niya nga dunay mga hungihong nga minilyon ka pesos ang gipasangil nga gikawat sa maong Koreano gumikan sa ilang problema sa kwarta sa ilang negosyo.
Tungod niini, wala tuguti sa korte nga makapiyansa ang maong dinakpan.
Matud pa nga kasagarang nipasaka og reklamo batok sa managsuong Koreano kay mga Koreano ra sab sama sa usa ka Joo Yung Kun kinsa may reklamo batok kanila.
Dihang gipangutana ang dinakapan kun nganong nadakpan siya, siya niangkon nga duna siyay gipang-forged nga mga papeles kaniadto. (BANAT NEWS)