Proyekto sa DPWH walay signage hinungdan sa disgrasya

CEBU, Philippines - Ang district engineer sa Department of Public Works and Highways (DPWH) Cebu 2nd District Engineering Office ug ang mga opisyal sa barangay Pitalo gipatawag kini ni Bokal Raul Bacaltos atol sa regular session kagahapon sa hunta probinsiyal kabahin sa giingong wala pagbutang og mga signage sa maong ahensiya sa ilang proyekto diha sa barangay Pitalo, lungsod sa San Fernando.

Si Rolando Frias, secretary sa nahisgutang barangay mipasangil nga daghan ang lapso sa implementasyon sa road widening project sa DPWH diha sa maong dapit.

Giingong pipila ka mga tinun-an nga miagi sa maong dapit ang nasamad human napandol sa mga putol nga kabilya ug ubay-ubay na usab nga mga motorista ang nabalintong.

Giingong ang DPWH nakalimot sa pagbutang og signage og “yellow caution” nga ribbon duha sa ilang gihimong proyekto.

Gawas sa mga opisyal sa barangay bisan ang mga bokal ilabi na ang gikan sa habagatang distrito nakabantay nga walay mga signage nga gibutang sa maong dapit pagpahimangno sa mga motorista nga maghinay ug magbantay nunot sa padayon nga trabaho sa dalan.

Si Engineer Leslie Anthony Molina ang district engineer sa Cebu 2nd District Engineering Office nagkanayon nga ang pagbutang sa mga signage trabaho sa contractor apan ang monitoring gikan sa ilang buhatan.

Ang AR Adlawan maoy contractor sa proyekto ug ang ilang representante nangangkon nga aduna sila’y gibutang nga mga signage apan paligsan kini sa pipila ka mga sakyanan ug kon dili mabantayan dili kini mabalik og butang.

Si Molina misaad nga himoan dayon nila og aksiyon  ang maong isyu pagtubag sa maong problema sa barangay ug sa mga provincial board.

Nunot niini, si bokal Sun Shimura kinsa maoy pangulo sa committee on public safety, peace and order sa hunta probinsiyal nagkanayon nga gawas diha sa Pitalo bisan sa ubang road widening projects o trabaho sa DPWH sa kadalanan sa ubang dapit sa probinsya wala sila’y nakita nga mga signage ug bisan tawo nga mobantay o reflector panahon sa gabii.

Si Shimura mipalabang kini og incidental motion atol sa session pag-awhag sa DPWH nga siguradohon nga mabutangan og  mga signage ug safety measures ang ilang proyekto diha sa mga dalan nga adunay padayon nga gitrabaho paglikay sa disgrasya sa mga mobiyahe.

(BANAT NEWS)