SuGod Program usa ka tuig na

CEBU, Philippines - Anaa sa 77 porsiyento ang success rate sa Surrender to God Program sa Archdiocese of Cebu subay sa tubag sa panawagan ni Presidente Rodrigo Duterte sa pagtabang sa mga tawo nga nalambigit sa ilegal nga drugas.

Ang SuGod Program nga gidumala sa Love of God Community nga gipangulohan sa executive director nga si Fe Barino nagsaulog sa ilang unang anibersaryo karong adlawa diin nakapagradwar na og 446 ka mga recovering addict sukad Agosto sa nilabay nga tuig.

Matud ni Barino nga sukad sa batch 1 hangtud 9, adunay 577 ka partisipante sa SuGod Program ug 446 niini ang nakahuman gyud sa 10 ka adlaw nga programa diin 12-anyos ang labing bata ug 60-anyos ang labing edaran.

Sila gikan sa nagkadaiyang lugar sa Probinsya sa Sugbo, Bohol ug Leyte.

Mapasalamaton si Barino tungod kay maoy unang tinguha nga makatabang sa mga tawo nga nalambigit sa drugas diin ang ila kanhi mga empleyado, paryente ug mga silingan nga tiggamitan og drugas ang una nilang mga kliyente.

Gitug-an ni Barino nga sa kinatibuk-an nga usa ka tuig, niabot sa P3 milyones ang ilang nagasto gikan sa personal nga panudlanan ug sa mga higala ug libre nilang gihatag ang seminar ngadto sa mga recovering addict.

Ang programa usa ka faith-based uban sa iyang program director nga si Rene Francisco kinsa maoy nagtabang sa mga recovering addict.

Malaumon si Barino nga molanat pa og daghan katuigan ug daghan pa usab silang matabangan nga mga tawo nga nalambigit sa ilegal nga drugas nga mabag-o sa ilang kaugalingon ug aduna na usab silay mga seminarian karon nga nitabang kanila nga makig-journey sa mga recovering addict sa dili pa sila mapari.

Ang SuGod Program nitabang sab aron masustineran sa mga recovering addict ang ilang recovery pinaagi sa paghatag og lugar nga kapuy-an ug kapanginabuhian sa halfway house nga gitawag og SuGod Living in Faith and Livelihood Program.

Karon tuiga ang SuGod Drug Recovery and Renewal Program aduna pay duha ka programa nga mahitabo karong Septiyembre ug Nobiyembre.

Si Cebu Archbishop Jose Palma nitug-an nga epektibo kaayo ang maong programa ilabi na sa mga recovering addict nga nakasinati sa gihatag nga oportunidad sa Ginoo pinaagi sa ilang pagtahan sa kaugalingon.

Dugang pa sa Arsobispo nga mahinangpon siya sa paningkamot sa mga tawo nga nitabang aron molambo ug molipang ang programa diin daghan ang nakaapil.

Gipahalipayan ni Palma ang mga nagpaluyo sa programa ug maoy iyang damgo nga padayunon ang pagsuporta ug daghan pang mga rehab centers nga mabuksan isip maoy tubag sa realidad sa problema sa drugas.

Atol sa unang anibersaryo sa SuGod, usa ka adlaw nga hudyaka ug kalingawan sa mga recovering addict nga nigradwar ug sugdan kini sa usa ka Santos nga Misa ug ang paglusad sa pag-ampo alang sa mga tawo nga nalambigit sa ilegal nga drugas. - /GMR) (BANAT NEWS)