PAGCOR funds ibayad paghakot sa basura

CEBU, Philippines - Gibutyag ni Executive Assistant to the Mayor Bimbo Fernandez nga ang P28.9 milyones nga PAGCOR fund ilang gamiton aron malugwayan ang kontrata sa Pasajero Motors Corporation (PAMOCOR) alang sa buwan sa Hulyo nga maoy naghakot sa mga basura sa siyudad.

Ang PAMOCOR maoy gikuhang private hauler sa kagamhanan sa Siyudad sa Sugbo nga maoy mohakot sa mga basura apan giingong mahuman na ang kontrata niini.

Nunot niini ang Department of Public Services (DPS) mogamit sa pundo sa Philippine Amusement and Gaming Corporation (PAGCOR) alang sa hauling operation sunod buwan.

Niadtong niaging adlaw, ang DPS niadto sa buhatan ni Cebu City Mayor Tomas Osmeña aron mangayo og pagtugot sa mayor nga gamiton ang maong pundo.

Nakalatid sa suwat nga gipapirmahan sa mayor nga ang paggamit sa maong pundo nagsubay sa bag-ong guidelines sa PAGCOR nga ang paggamit sa pundo alang sa hauling operation, ilang gitugot.

Nasuta nga gibuhat kini sa DPS gumikan kay nagpaabot pa sila nga maaprubahan ang gipangayo nila nga supplemental budget nga nagkantidad og P120 milyones.

Nasayran nga si Fernandez maoy gitahasan ni Mayor Osmeña sa pag-atiman sa maong pundo. Apan ang mayor niingon nga emergency procurement man o public bidding gikinahanglan gihapon kining moagi sa konseho.

“Whatever it is, it has to go through the City Council”, asoy ni Mayor Osmeña.

(BANAT NEWS)