Makig-coordinate paglikay sa ‘misencounter’

CEBU, Philippines - Andam makig-alayon ang Philippine Drug Enforcement Agency (PDEA-7) sa Cebu City Police Office (CCPO) aron malikayan ang “misencounter” sa panahon nga mohimo sila og operasyon sa usa ka lugar sa Dakbayan sa Sugbo.

Gitug-an ni PDEA-7 director Yogi Ruiz nga andam silang mohimo og koordinasyon sa CCPO apan adto lang sila mohatag kang city director PSSupt. Joel Doria.

Gitin-aw ni Ruiz nga wala kini nagpasabot nga wala silay salig sa local police sa lugar nga pagahimuan nila og operasyon. Usa lang kini ka paagi aron magmalampuson ang ilang lakaw. “I’m not saying nga wala ko’y salig. Salig man ta. Naa man atong pagsalig pirmi.  Kanang practice man gud na sa PDEA, that is the compartmentalization sa information. That is what we practice para wala’y leakage”, pasabot ni Ruiz.

Ang maong pamahayag ni Ruiz subay sa giingong diriyot nagka-engkwentro ang mga ahente sa PDEA-7 ug mga sakop sa Mobile Patrol Group (MPG) sa CCPO human unang gialarma ang mga sakop sa PDEA-7 nga armed persons atol sa ilang gihimo nga buy-bust operation sa may dalan Tres de Abril sa Brgy Pahina San Nicolas pipila ka adlaw na ang nakalabay.

Apan gihimakak ni Ruiz ang giingong misencounter kay dihang naabot ang mga sakop sa MPG sa dapit, nakita sa mga polis ang iyang usa ka sakop nga nagdala og armas ug nagsul-ob og PDEA t-shirt. Mao nga nunot niini, gihimakak sab ni Ruiz nga nagsibilyan ang iyang mga sakop apan wala kini nagsul-ob og PDEA-7 vest kay medyo dakung tawo ang iyang sakop ug wala’y maigo nga vest.

“Tanan natong PDEA agents nag-uniform, that time naa la’y usa kabuok wala nag-vest kay wala’y vest mainsakto sa iyaha, but naka PDEA siya”, pasabot pa ni Ruiz.

Nasayran nga sa maong operasyon, nasikop sa drug den si Lucero Manuel nga anaa sa drug watch list sa BADAC uban ang 6 ka tawo. (BANAT NEWS)