5 ka polis naa sa drug matrix

CEBU, Philippines - Kapin sa lima ka polis dinhi sa Sugbo, ug duna pay opisyal, nalista sa drug matrix sa miangkong drug lord nga si Franz Sabalones ug giimbestigar karon sa mga sakop sa Philippine Drug Enforcement Agency (PDEA7) ug ang ilang mga kabtangan hayan maisyuhan usab og freeze order sa hukmanan kay gituohan nga gikan kini sa ilegal nga drugas.

Si PDEA-7 Regional Director Yogi Felimon Ruiz wala hinoon motugot sa mga reporters nga tan-awon ang mga ngalan nga diha sa drug matrix ni Sabalones.

Matud ni Ruiz nga ang mga ngalan sa maong mga polis nalakip sa affidavit ni Sabalones nga gipreparar sa kadagkoan sa PDEA ug mga imbestigador sa Camp Crame.

Gitug-an ni Ruiz nga ang maong mga polis nga naapil sa drug matrix ni Sabalones gihimoan usab nila og “lifestyle check” ug gisubay ang ilang kapasidad nga makasuporta sa ilang lifestyle. Dunay mga opisyal sa kapolisan nga dinhi madestino sa Sugbo kaniadto nga gipanglabay sa lagyong mga dapit, ug pipila kanila gipasanginlan ni PNP Chief Ronald “Bato” dela Rosa nga nagdawatan og payola gikan sa mga drug lords.

Apan wala hinoon moangkon si Ruiz kun apil ba ang maong mga polis sa listahan nga gitug-an ni Sabalones nga iyang mga kakunsabo ug protektor sa ilegal niyang negosyo sa drugas.

Ang Court of Appeals miisyu og freeze order nga nagpugong sa pagbaligya sa daghang katigayonan nga gipanag-iya ni Sabalones, apil na sa iyang mga deposito sa bangko nga ang tanan mikabat og labing menos P76 milyones.

Matud ni Cebu Provincial police director Eric Noble nga ang freeze order nga giisyu sa Court of Appeals dako kaayo og ikatabang sa kampanya kontra drugas ug kini usa ka lig-on nga mensahe alang sa uban nga sila maoy sunod.

Gitug-an ni Noble nga nakadawat siya og impormasyon nga bisan og si Sabalones gi-custody na sa Camp Crame apan ang iyang mga sakop dinhi sa Sugbo padayon pa gihapon sa ilegal nila nga kalihokan diha sa dakbayan sa Talisay, Carcar ug San Fernando.

Si Sabalones nakapanag-iya og nindot kaayong resort diha sa San Fernando, diin ang iyang igsuon maoy bise mayor. Matud ni Noble nga magpaabot sila sa hukom sa Anti-Money Laundering Council nga siguradong naghimo usab og buwag nga imbestigasyon.

Naglaum si Noble nga apilon usab unta nga isyuhan og freeze order ang ubang drug personalities ug mga tawo nga nagproteher sa negosyo ni Sabalones.

Si Noble miingon nga niining ilang pagbalik sa Oplan One Time Bigtime, dili usab sila mohunong sa paggukod ug pagpaniid sa mga tawo nga nalambigit sa ilegal nga drugas. Jojo C. Ugdol ug Rowena D. Capistrano (BANAT NEWS)