Way hulga sa Miss U
CEBU, Philippines - Walay hulgang nadawat ang Dakbayan sa Lapu-Lapu ug ang kapolisan sa siyudad ang nagpabiling red alert sukad sa niaging tuig.
Nagkanayon si Police Chief Inspector Junnel Caadlawon, chief of operations sa Lapu-Lapu City Police Office, nga luwas ang siyudad gikan sa pagsaulog sa Pasko ug Bag-ong Tuig.
Kini magpadayon hangtud sa kalihukan sa Miss Universe diin ang swimsuit competition ipahigayon sa JPark Island Resort and Waterpark sa Barangay Maribago.
Sa usa ka conference sa Association of Barangay Councils kagahapon sa buntag kauban ang LLCPO kabahin sa pagpangandam sa Miss Universe pageant, nihangyo si Basak Barangay Kapitan Isabelito Darnayla og police visibility ilabi na sa gabii sa iyang barangay tungod kay dunay mga estranghero ang gikatahong nidagsa sa maong dapit.
Nipasalig si Caadlawon nga mohatag sila og dugang seguridad sa maong lugar ingon man sa laing barangay nga maapektuhan sa dakung kalihukan.
Adunay 300 ka polis ang LLCPO nga ipakatap alang sa Miss Universe ug laing 300 ka augmentation force gikan sa Police Regional Office-7.
Gawas niini, usa sab ka international meeting gikan sa nagkalain-laing nasud ang ipahigayon sa Shangri-la Hotel.
Pahimangno ni Caadlawon ngadto sa publiko nga gustong motan-aw sa Miss Universe pageant nga dili magdala og backpack kun dili mga gagmay’ng bag lang. -/GMR (BANAT NEWS)
- Latest
