28 libud-suroy gihipos
CEBU, Philippines - Mga batang libud-suroy na-rescue atol sa joint operation nga gipahigayon sa mga otoridad sa mga kadalanan sa siyudad niadtong Miyerkules sa gabii.
Ang maong pagronda gitawag og "Operation Gugma" inubanan sa kapulisan, social workers ug mga volunteers dinhi sa siyudad.
Sa 28 nga nahipos siyam lang ang gidala sa Parian Drop In Center tungod kay ang kadaghanan kanila gipanguha sa ilang mga ginikanan.
Matud sa report, 3-anyos ang kinabataan nga ilang na-rescue samtang 15 anyos ang kinamaguwangan.
Sigon pa ni Redentor Betito, executive director sa Commission for the Welfare and Protection of Children, ipaubos sa livelihood training ang mga ginikanan sa mga bata aron di na mamalik sa kadalanan ilang mga anak.
Sa pagkakaron, 10 ka mga ginikanan ang nahatagan nila og trabaho isip park attendants sa siyudad. Lakip sa mga panginabuhian nga ilang matudlo o mahatag mao ang pagpaninda ug pagmaneho og trisikad.
Dugang pa ni Betito, ang budget nga ilang gigamit sa paghatag og panginabuhian sa mga ginikanan naggikan sa sobra sa niaging tuig nga budget nga nagkantidad og P2.8 milyones.
Suma pa ni Konsehal Margarita Osmeña, deputy mayor sa social services sa siyudad nga sa miaging administrasyon wa magamit ang maong budget tungod kay P800 mil lamang ang nagamit sa pag-profiling sa mga 600 ka mga libud-suroy.
Misaad si Osmeña nga gamiton ang gitaganang budget aron makabenepisyo ang mga libod suroy niini.
Sa miaging semana, adunay panagtigom si Osmeña kauban ang Department of Social Welfare Development-7 tungod kay nangayo kini sa resulta sa implementasyon sa mga programa alang sa mga bata.
Dugang ni Osmeña, ang DSWD-7 gikatakdang mohatag og P1.4 milyones nga budget sa mga programa para karung tuiga. (BANAT NEWS)
- Latest