Ipahunong ang illegal mining sa rehiyon

CEBU, Philippines - Nagtinguha karon ang Mines and Geosciences Bureau sa Central Visayas (MGB7) nga maundang ang mga operasyon sa ilegal nga minahan ug quarrying sa rehiyon apan nagkinahanglan kini og mas lig-on nga koordinasyon sa ubang hingtungdan.

Ang tumong sa maong ahensiya nga mapalig-on ang kooperasyon niini sa mga lokal nga pangagamhanan aron mapalapdan ang pagsakop sa maong ilegal nga mga operasyon nga nagpadayong naglihok sa rehiyon.

Tuyo sa MGB-7 nga pausbawon ang panag-uban niini tali sa mga lokal nga pangagamhanan ilabi na sa panawagan sa bag-ong administrasyon ubos ni Presidente Rodrigo Duterte nga kinahanglan tutokan ang maong mga aktibidad.

Sa SONA ni Duterte niadtong Lunes, apil niyang gihisgutan ang maong problema. Gimanduan niini ang puwersa sa militar sa paghatag og suporta sa ilegal nga pagmina ug ubang binuhatan nga makadaot sa kalikupan sama usab sa illegal logging.

Lakip nga mando sa presidente ngadto sa Department of Environment and Natural Resources (DENR) sa pag-review sa mga permits sa mga nagpadayong operasyon sa minahan aron masiguro nga nagsunod kini sa mga standards nga gihatag sa goberno.

Si Alburo miingon nga kun mahibaw-an nga nag-operate ang usa ka minahan o quarry nga walay permit, ang lokal nga pangagamhanan o ang MGB-7, kinahanglan hatagan dayon kini og cease-and-desist order.

Ang small-scale mining operations gi-regulate sa mga lokal nga pangagamhanan samtang ang mga large-scale mining ubos sa supervision ug regulation sa MGB-7.

Mapagamay o mapadaku man nga operasyon sa minahan nagkinahanglan gihapon sila nga mokuha og Environment Compliance Certificate (ECC) sa DENR.

Ang minahan ug quarrying adunay importante nga papel sa pagpalambo sa urban investments sa konstruksyon dinhi sa rehiyon apan ang ilegal ug small-scale mining midaghan gumikan sa pagtaas sa demand sa aggregates. (BANAT NEWS)