CEBU, Philippines - Dili mominus sa walo ngadto sa napulo ka kilo nga karneng pawikan ang nakonpiskar sa mga tinugyanan sa Department of Environment and Natural Resources ug Maritime Police nga idunggo unta sa Pasil Fish Port gikan sa Talibon, Bohol.
Matud sa tigpamaba sa DENR-7, Eddie Llamedo, nga ikatulong higayon na kini nga insidente.
Sa pagkasikop sa duha ka tawo padayon nga mopahigayon og surveillance ang ahensiya aron walay makalusot.
Si DENR-7 Director Isabelo Montejo niingon nga padayon silang mohimo og surprise surveillance ug pagbisita sa Pasil Fish Port.
Ang karne sa pawikan sagad gamiton sa pagluto og larang diin mapalit kini sa presyo nga P60 ngadto na sa P70 matag hiwa.
Gihimug-atan sa ahensiya nga usa ka ilegal ang pagkaon sa karne ug ang masakpan mahimong mapasakaan og kaso.
Mahimong mapriso sa dili moubos sa lima ka tuig ang masakpan niini ug multa nga P500,000 ngadto sa P1 milyon.
Ang motorbanca gitugyan na ngadto sa Cebu Coast Guard.
Gipadayag ni Llamedo nga duha ka lugar ang ilang gitutukan karon nga adunay namaligya sa mga karne sa pawikan nga naglangkob sa Pasil ug Tangke sa Dakbayan sa Talisay nga kadaghanan gikan sa Talibon, Bohol. Decemay P. Padilla ug Rowena D. Capistrano (BANAT NEWS)