Pugante tipi sa polis

CEBU, Philippines - Patay nga lawas sa usa ka lalaki nga dunay pinusilan sa agtang ang nabangalan sa mga mananagat sa Sitio Patag, Brgy. Argawanon sa Lungsod sa San Remigio kagahapon sa buntag.

Ang maong lalaki giila nga si Joselito Pantaleon, 31, usa ka pugante sa Medellin District Jail niadtong bulan sa Oktubre sa nakalabay nga tuig ug giingong taga Brgy. Hagnaya, San Remigio.

Ang suspetado nag-atubang og kasong paghupot ug pagbaligya og shabu lakip na ang paghupot og drug paraphernalia.

Si Pantaleon ang positibo nga giila sa mga sakop sa San Remigio Police nga usa sa mga nalambigit sa nahitabong pinusilay tali sa mga polis atol sa gihimong buy-bust operation sa Sitio Patag, Argawanon niadtong Lunes sa buntag.

Ang desk officer sa San Remigio Police nga si Police Officer 3 Dante Teaño nga nahinabi sa Banat News miingon nga mismo ang mga kabanay ni Pantaleon ang miila kaniya human kini nakuha gikan sa dagat.

Matud pa ni Teaño nga usa ka samad pinusilan sa agtang nga milapos sa likod gamit ang wala pa masayri nga kalibre sa armas ang naangkon sa suspetsado.

Si Teaño miingon nga positibo gayod nga gitudlo sa iyang mga kauban si Pantaleon nga usa sa mga misukol sa mga polis atol sa pagpangronda niadtong Lunes.

Ang hepe sa San Remigio Police nga si Sr. Insp. Stephen Amamag-id nga nahinabi sa Banat News miingon nga si Pantaleon ang usa sa mga armadong tawo nga nagsilbing back up sa magsuong Rico ug Ruben Dabucol nga mao untay target apan nakaeskapo.

Atol sa ilang operasyon nakamatikod ang usa sa mga target sa mga polis ug nahitabo ang pinusilay.

Lima ka mga tawo ang gikatahong nanglayat sa dagat duha ang nakatabok, duha ang mibalik ug mitahan apan ang usa ang nawala.

Si Amamag-id nagduda nga lagmit naigo sa pinusilay si Pantaleon apan kini naunlod sa dagat hangtod nga nakit-an lang human milutaw.

Si Amamag-id miingon nga wala sila mikompiyansa kay nakadawat sila og impormasyon nga mibahad ang magsuong Dabucol nga mosukol sa mga polis kung sila dakpon.

Dako ang pagduda ni Amamag-id nga lagmit mikuyog sa grupo sa magsuong Dabucol si Pantaleon aron kini dunay proteksyon human nakaeskapo sa prisohan.

Sa laing operasyon, P200 mil nga kantidad sa gituohang shabu ang nasakmit sa mga sakop sa Mambaling Police diha sa Sitio Lomboyan, Brgy. Duljo- Fatima ning Dakbayan sa Sugbo.

Nasikop sa kapulisan atol sa gihimo nga buy-bust operation si Rolando Matutinao Jr., nga mibaligya og drugas sa usa ka polis.

Narekober sa mga polis ang tulo ka medium size ug upat ka mga gagmay nga pakete nga may sud nga gidudahang shabu nga mikantidad og P207, 090  ug mitimbang sa 17.55 gramos.

Nadakpan usab  ang usa ka gipasanginlang level 3 drug pusher sayo kagahapon sa kaadlawon sa mga tinugyanan sa Talamban Police Station pinangulohan ni Police Senior Inspector Percival Miasco sa gipahigayon nilang buy-bust operation sa may Talamban Hill Side.

Ang nasikop naila nga si Mark Ravin Flores, 19, residente sa Brgy. Budlaan, ning Dakbayan sa Sugbo.

Nakuha kaniya ang onse ka putos ug laing usa ka dako nga putos sa gituohang shabu lakip ang buy-bust money nga P200 ug ang gituohan nga halin nga P600. (BANAT NEWS)