Joavan priso tibuok kinab uhi
![Joavan priso tibuok kinab uhi](https://www.philstar.com/images/articles/joavan-fernandez_2016-05-24_11:50:25.jpg)
CEBU, Philippines – Ang kontrobersiyal nga anak ni Talisay City councilor Socrates Fernandez nga si Joavan Fernandez gikombikto ug gihukman nga mabilanggo sa tibuok niyang kinabuhi (reclusion perpetua) sa kasong illegal possession of explosives. Gawas sa maong hukom si Regional Trial Court (RTC) Judge Soliver Peras sa Branch 10 mikonbikto usab ni Joavan sa kasong illegal possession of firearms ug gihukmang mabilanggo sulod sa upat ka tuig, duha ka buwan ug usa ka adlaw o maximum ngadto sa unom ka tuig ug pabayron usab siya og P15,000 nga multa.
Si Joavan gikombikto usab ni Peras sa kasong kalapasan sa Comelec gun ban ug gihukmang mabilanggo sulod sa duha ka tuig, usa ka adlaw ug maximum ngadto sa upat ka tuig. Ang maong hukom giluwatan ni Peras niadtong Mayo 24, 2016.
Subay niini, niadtong Mayo 6, 2013 sa alas -7 sa gabii diha gawas sa balay sa iyang amahan sa South Gate Subdivision si Joavan naembargohan sa mga polis og usa ka fragmentation grenade ug usa ka Deringger Black Widow .9mm Revolver nga adunay upat ka bala ug usa ka bala sa caliber .45. Si Supt. Elmer Lim maoy hepe sa kapolisan sa siyudad niadtong higayona uban sa iyang mga sakop miadto sa balay sa mayor aron mo-serve og warrant of arrest batok kang Joavan.
Si PO1 Edwin Campomanes kinsa maoy mikapkap kang Joavan ang giingong naka-recover sa nahisgutang granada ug pusil diha sa bulsa ni Joavan.
Subay usab sa 16 ka pahinang hukom ni Peras nagkanayon kini nga credible ang testimoniya sa witnesses sa prosekusyon ug balido ang pagpahigayon og body search ni Campomanes ngadto kang Joavan.
Niadtong higayona dihang naimbargohan si Joavan sa maong ebidensiya naatol nga election period ug si Joavan wala makapakita og dokumento nga duna siya’y exemption sa pagdala og eksplosibo ug pusil.
Matud ni Peras nga ang ebidensiya usab nga gisumitir sa prosekusyon sufficient kini nga makaestablisar nga dunay nahimong kalapasan si Joavan.
Si Joavan mihimakak sa maong mga pasangil apan napakyas siya sa pagpresentar og ebidensya nga makasuporta sa iyang pasangil nga adunay kalagot niya ang mga polis.
Sa iyang bahin, si Konsehal Fernandez sa iyang pamahayag sa The Freeman kagahapon nagkanayon nga wala pa silay lakang gibuhat karon. Si Joavan ibalhin ngadto sa prisohan sa Abuyog, Leyte. - /EIM
- Latest