V-Hire terminal balhin na sa SM Seaside
CEBU, Philippines - Gikatakdang mobalhin na sa SM Seaside City karong adlawa ang mga Van-for-Hire (V-Hire) gikan sa Compania Maritima sa Barangay Ermita.
Apan ang mga drayber buot nga si Mayor Michael Rama ang momando kanila sa pagbalhin.
“Wala na man gyud mi mabuhat ani, wala na man sad mi’y choice, aware sad mi nga karon mi mobalhin pero maghuwat mi nga naa gyuy moanhi unya mosulti namo nga mobalhin na mi didto, kanang i-close gyud ni nila ba. Pero mas okay gyud nga si Mayor Mike Rama ang moduol namo,” matud sa usa ka drayber nga dili magpaila.
Siya nidugang nga ang ilang pagbalhin mosangpot sa pagminus sa pasahero kinsa mogasto na sab og dugang, lahos og gikan sa sentro sa siyudad.
“Ni-risk na gali mi og bayad og mahal para lang maabot dayon unya ibalhin na nuon sa SM,” reklamo sa pasahero nga si Daphne Daffodil Quiachon.
Kasagaran sa mga pasahero niingon nga mas maayo kung adunay rota sa jeepney sa maong dapit aron mas dali ug komportable para kanila.
Si Rama nibutyag nga pangitaan niya og paagi ang pagpakigtagbo sa mga drayber. (BANAT NEWS)
- Latest