CEBU, Philippines - Nalandig sa tambalanan ang usa ka asawa human kini gipusil sa iyang bana gumikan sa ilang away sa kadako sa ilang bayranan sa tubig diha sa Sitio Luknay, Barangay South Poblacion, lungsod sa San Fernando pasado alas 12 sa nakalabay nga udto.
Ang biktima nag-edad og 66-anyos, samtang ang suspetsadong bana nag-edad og 73-anyos nga regular nga trabahante sa munisipyo sa maong lungsod nga nadestino sa merkado nga tig-isyu og ticket.
Sumala pa ni Police Officer 1 Rodjie Alicaway nga maoy usa sa mga nakaresponde sa hitabo ug nabinabi sa Banat News, nahitabo ang lalis sa magtiayon sa dihang nahibaw-an sa bana nga miabot og kapin P22 mil ang bayranan sa ilang tubig.
Matud pa ni Alicaway nga adunay gipaabangan nga mga lawak ang magtiayon ug ang biktima ang nagdawatan sa mga bayad sa abang.
Matud pa nga naglagot ang bana nganong wala nabayran ang ilang konsumo sa tubig ug hapit pa hinuon sila maputli og tubig.
Samad pinusilan sa paa ang naangkon sa iyang asawa nga dali usab nga gidala sa Cebu Provincial Hospital sa Dakbayan sa Carcar diin luwas na hinoon kini sa delikadong kahimtang.
Apan dihang gipangutana ang suspek, kini miinsister nga aksidente ang nahitabo kay natagak ang bag nga gisudlan sa iyang armas ug nibuto kini maong naigo sa paa ang iyang misis.
Wa pa matino sa kapulisan kung aduna bay lisensya sa paghupot og armas ang suspek. Ang armas nga .45 caliber pistol gipaubos na sa ballistic examination samtang gipaabot pa kun mopasaka og kaso ang asawa niini. (Jojo C. Ugdol ug Lorjelist Llanto, USJR Intern/EIM)
17-anyos gipusil patay
Nakabsan sulod sa tambalanan ang usa ka 17- anyos nga babaye human kini girapido samtang naglingkod sa gawas sa ilang balay diha sa Sitio Sodom, Barangay Duljo-Fatima ning Dakbayan sa Sugbo kagahapon sa kaadlawon.
Ang biktima giila nga si Analiza Cabaluna, duna’y ka live-in partner ug nagpuyo sa maong dapit.
Sumala pa ni Police Officer 3 Winston Ybañez, imbestigador sa Homicide Section sa Cebu City Police Office nga nahinabi sa Banat News nga posibleng naalaan lang ang biktima kay dili kaayo hayag ang suga sa iyang nahimutangan.
Matud pa ni Ybañez , kauban nga naglingkod sa biktima ang kapuyo nga si Francis Comedero kinsa nakabantay sa gipasiwil nga sumbohan sa armas dapit sa koral sa ilang balay ug dayon misunod na ang buto-buto sa armas.
Human sa pagpamusil paspas usab nga misibat sa lugar ang gunman. Samtang ang biktima naigo sa abaga ug dali nga gidala sa Cebu City Medical Center. Apan alas 2:45 sa kaadlawon nakabsan kini sa kinabuhi.
Si Ybañez miingon nga niadtong Enero 6 ning kasamtangan nga tuig gipusil patay ang paryente sa biktima diha gihapon sa maong dapit.
Upat ka basiyo sa bala sa kalibre .45 nga pistola ug duha ka deformed slugs ang nakuha sa kapulisan sa crime scene. Padayon pang gisusi ang motibo sa pagpamusil. (BANAT NEWS)