IEC Volunteer salig gihapon sa Ginoo

CEBU, Philippines - “If God really wants to change you and your life for the better, He will somehow give you challenges that would make you realize what you’re capable of,” kini maoy pagtuo ni Charlene Dinawanao.

Si Charlene usa sa mga volunteers sa simbahan alang sa gipahigayon karong 51st International Eucharistic Congress.

Niadtong Enero 24, 2016 dakong sunog ang nahitabo sa Brgy. Duljo-Fatima ning Dakbayan sa Sugbo ug gilamoy ang 45 ka mga panimalay ug kapin sa P400mil ang danyos nga gibilin niini.

Usa ang balay sa pamilya ni Charlene ang naugdaw sa maong sunog. Nasuta usab nga kini na maoy ikaduhang insidente nga nasunogan sila sa ilang panimalay sa maong dapit.

Samtang nagserbisyo siya atol sa Opening Mass sa IEC niadtong Domingo, gipahibalo na lang siya pinaagi sa text nga naapil og kasunog ang ilang balay nianang mga orasa.

 “It’s a process, I know dili dayon nimo makuha imong gusto makuha, karon dako siya nga problema but I’m positive na makaya ni namo,” matud ni Charlene.

`Miangkon si Charlene nga sa kaniadtong bata pa siya, usa siya sa mga batan-on nga dili tigsimba ug gihulagway niya layo gyud  siya sa dughan sa Ginoo. Misamot kini niadtong gibiyaan sila sa iyang mama duha na ka tuig ang milabay.

Apan sa kadugayan, bisan pa man sa iyang kaguol, nakaamgo siya ug nakat-onan niyang di magpaapekto sa nanghitabo sa ilang kinabuhi.

Sa katapusang tuig niya sa high school iyang nakita kung unsa gayud molihok ang Ginoo dihang nagsige na siya og apil sa mga Bible studies nga dili sa simbahan diin siya gibunyagan.

Apan dihang nabati na unta niya nga hinayhinay siyang nakapaduol sa Ginoo, daw gipusdakan siya og bag-ong pagsuway dihang naapil og kasunog ang ilang balay niadtong 2010.

 “That was the first time, mao ‘toy pinakasakit, that time I kind of forgot all the teachings that I learned, I blamed Him,” pag-angkon pa ni Charlene.

Naguol ug nakapangutana si Charlene kung nganong pirme na lang siya tagaan og problema sa Ginoo.

Apan diay to, imbes nga padayunon ang iyang pagbasol sa Ginoo, nag-ampo siya ug nangayo siya’g pasaylo ug nanghangyo nga giyahan siya kung unsaon niya pagtabang iyang pamilya niining mga pagsuway nga ilang giagian karon.

 Sa iyang pagbalik sa bible studies, diha-diha dayon adunay oportunidad nga miabli para niya.

 “Nakaingon ko sa usa ka meeting, nga: ‘Lord, ganahan nako mobalik nimo Lord’ didto nag-start, kalit-kalit dayon gi-offeran ko ni sister nga mag-volunteer didto sa commission on migrants,” matud pang Charlene.

Didto nakat-on ug nalingaw siya sa iyang trabaho pagtabang sa  mga nanginahanglan.

“Wala na change akong mind, hangtod karon willing gihapon ko mo-volunteer because I know that God has better plans for me, I just have to be positive.

I don’t know ngano maka-manage pa ko og smile despite sa mga nahitabo, although naay part sako kasing-kasing nga sakit.

Gaan gihapon akong pamati kay kabalo ko nga matabangan ra ko sa Ginoo,” miingon si Charlene.

Bisan siya nakapangutana kun nganong makaako pa gihapon siya pagkatawa atubangan sa iyang mga higala bisan sa ilang kagul-anan karon. (BANAT NEWS)