Bata natagak sa bleacher samtang nagtan-aw sa parish encounter sa IEC
CEBU, Philippines - Usa ka 10-anyos nga batang lalake ang naangol ug nalandig sa tambalanan human nahulog gikan sa bleacher.
Nahitabo kini samtang nagtan-aw sa cultural presentation sa San Roque Parish sa Dakbayan sa Mandaue atol sa gihimong Parish Encounter niadtong adlaw’ng Miyerkules, Enero 27.
Ang maong bata giila nga si Felix Minnard Laugan, 10, residente sa Sitio Fatima, Barangay Subangdaku sa naasoy’ng siyudad.
Matud ni Senior Superintendent Jonathan Cabal, City Director sa Mandaue City Police Office (MCPO) ang maong bata uban sa iyang apohang lalaki ug mga higala didto sa San Roque Gym ug nanan-aw og cultural presentation.
Ang maong bata didto naglingkod sa pinakatumoy sa bleacher ug dihang misandig kini sa bleacher uwahi na nga nahibaw-an nga tarpaulin lang ang giali hinungdan nga nalahos kini pagkahulog sa gibana-bana nga napulo ka tiil nga gihabugon.
Nasayran nga nidalikyat diay og pauli ang apohan sa bata kay naglain ang tiyan niini ug sa iyang pagbalik mao na lay iyang nasayran nga gitabang iyang apo ug gidala na sa UC Medical Center diha sa North Reclamation.
Hinuon human napaubos sa CT Scan ug x-ray ang bata wala kini grabeng nahiagumang kadaot sa lawas ug sa ulo ug luwas na ang kahimtang. Si Cabal nagplano nga mag-solicit og hinabang aron matabangan ang ginikanan sa bata sa bayrunon sa tambalanan.
Gitataw ni Cabal, mohimo sila og imbestigasyon aron pagsuta kun aksidente o dili ang nahitabo samtang gipahimangnoan niya ang publiko nga di pasagdan ang mga bata kun moadto sa sama niini kadagkong kalihokan. (BANAT NEWS)
- Latest
