Talisay City wa moapil sa Sinulog

CEBU, Philippines - Gisayangan ang konseho sa Dakbayan sa Talisay nga wala sila nakaapil sa Sinulog 2016.

Ang Talisay City Central School mao’y kampiyon sa Sinulog sa Kabataan sa Lalawigan ug ikalima sa Sinulog-base category sa niagi’ng tuig.

Si Konsehal Richard Francis "Choy" Aznar, chairman sa Committee on Education, nagkanayon nga nahibulong siya kun ngano’ng wala nakasalmot ang Talisay. Usa sa hinungdan mao ang ka wala’y budget.Apan si Aznar nitug-an nga bisan kaniadto nga magsige og apil ang Talisay, awahi na sila makapagawas og budget.

Nahimo pa’ng kontrobersyal ang contingent sa Talisay human ang premyo kaniadto gigamit ni City Budget Officer Edgar Mabunay.

Matud ni Erwin Caparida, kanhi principal sa Talisay City Central School,  nga hangtud karon wala pa gihapon nasulbad ang mao’ng isyu.

Si Aznar nagtuo nga usa sab seguro sa rason nga wala moapil ang Talisay tungod sa isyu sa kwarta nga ila’ng premyo.

Samtang si City Administrator John Yre de los Reyes, anak ni Mayor Johnny V. delos Reyes, niingon nga sa wala pa ang Sinulog sa Kabataan ila’ng gipatawag ang DepEd sa Talisay kinsa nipahibawo nga dili nila priority ang Sinulog tungod sa ka busy nila sa Central Visayas Regional Athletic Association (CVIRAA).

"I hope nga wala’y politika nagpaluyo ani’ng tanan. We are 100% mosuporta gyud sa mao’ng event. Makita nato for the last two years nga niapil gyud ta sa event but karon natingala gyud mi na dili man sila interesado," asoy ni John Yre pinaagi sa text message.

Apan si City Schools Division Superintendent Leah Noveras niklaro nga wala sila nagka-estorya ni John Yre bahin sa Sinulog ug wala sila gipatawag og meeting ug wala sab sila kadawat og suwat sa mao’ng katuyuan.

Nipasabot si Noveras nga ang ila mao lang ang pag-coordinate sa siyudad kung unsa ang ila’ng ipahimo. "Ang wala lang maklaro diha karon kay ang budget since last time wala na mosugot ang COA nga kuhaon sa SEF so didto na siya sa General Fund which we have no knowledge of," matud ni Noveras.

"Wa pa man activity sa City nga gipa-handle namo nga amo’ng gi-turn down. I can site many successful activities nga sa City unta pero DepEd ang nag-handle," dugang ni Noveras. (BANAT NEWS)