Streamers batok Rama gipangbitay

CEBU, Philippines - Gipadayag sa mga biktima sa demolisyon ang ila’ng pagsuporta sa pagsuspenso kang Cebu City Mayor Michael Rama pinaagi sa pagbitay og mga streamers.

Tulo ka streamers ang gibutang sa may F. Ramos Extension sa Barangay Capitol Site sa usa ka Lito Pasilan.

Si Rama gipahamtangan og 60 ka adlaw nga preventive suspension sa Office of the President nunot sa kaso nga gipasaka ni Labangon Barangay Kapitan Victor Buendia kinsa niingon nga ilegal ang pagpademolis ni Rama sa median structure sa ila’ng lugar.

Nitug-an si Pasilan nga siya ang nagbutang sa streamers ug nisuporta siya sa mga gisuwat niini tungod sa dili makiangayon nga demolisyon sa ila’ng panimalay.

Matud ni Pasilan nga gisugo ra siya sa usa ka opisyal kinsa’ng pangalan gitago sa Banat News kay wala pa kini nitubag sa mga tawag ug text messages.

“Nisuporta ra pud mi ana kay wala mi gihatagan og relocation. Giguba man amo’ng balay. Nagpayag-payag ra mi karon. Sa 27 ka balay, unom ray gihatagan,” matud niya.

Matud niya nga gihatagan sila og P20 milyones sa kagamhanan human sa demolisyon ug giingnan sila nga ang ila’ng relocation site didto sa Barangay Pit-os.

Apan matud niya nga wala pa gihapon sila makabalhin hangtud karon ug wala sila nasayud sa rason.

Sa laing bahin, matud ni Rama nga iya na lang kini’ng itugyan ni acting Mayor Edgardo Labella. Si Labella una na’ng nimando sa Prevention, Restoration, Order, Beautification, Enhancement (PROBE) Team sa pagtangtang sa mga political streamers nga gipangsab-it sa mga publiko’ng lugar sa siyudad.

Matud ni Rama nga angay lang ipatangtang ang tanang tarpaulin ug mga streamers nga wala’y permit gikan sa kagamhanan.

Nasayod si Rama nga “politically-motivated” ang pagmontar sa streamers tungod kay election season na karong panahona.  (BANAT NEWS)