CEBU, Philippines – Gironda sa mga sakop sa National Bureau of Investigation-7 ang giingong drug den diha mismo tupad sa Cebu City Hall sa dalan D. Jakosalem kagahapon sa buntag nga miresulta sa pagkasikop sa tulo ka tawo nga naglakip sa duha ka mga babaye.
Ang mga nadakpan mao ang managkapuyo nga Christopher Hilongos, 20, ug Gladys Entoma, 20, ug Fidelina Salcedo, 20.
Matud pa ni lead agent Arnel Pura, adunay impormanteng miduol kanila bahin sa ilegal nga mga kalihokan sa maong lugar nga naglakip sa operasyon sa drug den.
Sa gihimong pagpaniid sa NBI, ilang nasakpan nga adunay mga manuyopay nga kustomer ang mga suspek nga mga estudyante, empleyado sa Cebu City Hall ug mga nagtrabaho sa Carbon Public Market ug taud-taod na kining nag- operate.
“Intel report nga naay tiggamitan nga taga City Hall lalo ‘pag sweldo. We wanted to neutralize the drug dens,” matud ni Pura.
Usa ka buy-bust operation ang gihimo batok ni Entoma ug human natigayon ang transaksyon dali silang gidakop apil iyang kapuyo nga si Hilongos ug si Salcedo. Nakuha kanila ang shabu nga nagkantidad og P300 ug drug paraphernalia.
Apan sila si Entoma ug Hilongos mihimakak sa pasangil. Ang duha adunay 3-anyos nga anak babaye. Matud ni Entoma igo ra siya nga gisugo paghatag sa maong shabu sa kustomer ug di tinuod nga aduna silay drug den.
Si Mayor Michael Rama pagkasayod sa hitabo mimando dayon kang Atty. Jade Ponce nga subayon ang maong lugar.
Matud ni Rama nga kaniadto pa siya nagduda nga adunay mga ilegal nga nanghitabo sa maong dapit. Ug gawas pa niana, kini ‘fire prone area’ ug kinahanglang i-reblock daan ug di na paabuton pang adunay mahitabong sunog.
Gimando usab ni Rama pagpasubay sa tanang mga business permits sa mga nagnegosyo sa dapit ug ipaubos sa profiling ang namuyo niini aron mahatagan dayon sila og hinabang kun kinahanglanon. – /EIM) (BANAT NEWS)