LP ug One Cebu nag-abot sa Comelec

CEBU, Philippines - Mga kandidato sa Liberal Party (LP) ug One Cebu Party sa Sugbo nag-abot kagahapon sa buntag sa pagduso nila og certificates of candidacies (COC) diha sa buhatan sa Comelec sa probinsiya.

Si incumbent Gov. Hilario Davide III ug ang iyang kaatbang nga kanhi presidente sa Government Service Insurance System (GSIS) Winston Garcia naglamanohay diha sa gawas sa Comelec sa ilang panag-abot.  Diha usab si incumbent Vice Gov. Agnes Magpale.

Ang One Cebu gikan pa nitambong sa Santos nga Misa sa Saint Therese Parish Church sa Lahug samtang gikan usab sa samang kalihokan ang LP nga gihimo sa Capitol Parish  ug nag-abot sila sa Comelec.

Si Nerissa Soon-Ruiz maoy modagan isip bise gobernador ubos sa landong sa One Cebu ug iyang makaatbang si Magpale sa LP.

Miduso usab og COC ubos sa One Cebu ang incumbent nga kongresista sa ikatulong distrito nga si Gwendolyn Garcia ug ang iyang makaatbang nga si incumbent board member Grecilda Sanchez sa LP.

Si Pablo John Garcia sa One Cebu miduso usab sa iyang COC pagka-kongresista sa ikapitong distrito atbang ni incumbent board member Peter John Calderon sa LP.

Matud ni Winston nga gikonsederar niya iyang kaugalingon nga underdog kang Davide tungod kay incumbent kini. Apan si Davide sa iyang bahin, nagkanayon nga panahon sa eleksiyon patas ang mga kandidato ug walay underdog.

Hinuon siya mibutyag nga kaniadto pa sila managhigala ni Winston ug sila nagkauban usa ka higayon isip maoy private prosecutors sa Chiong Case niadtong 1997.

Sa paglamanohay sa duha, nangomedya pa si Davide kang Winston sa pag-ingon: “Kagwapo nimo og t-shirt uy blue, WFG.”Si Winston simple lang usab pagtubag sa pag-ingon “Oo, WFG, Winston for Governor” uban sa pahiyom nga nakapangisi usab sa ilang tagsatagsa ka supporters nga diha sa ilang palibot.  (BANAT NEWS)