CEBU, Philippines – Usa ka 21 anyos nga tinun-ang lalaki nga gibuwagan sa uyab ang napalgang patay ug gituohang naghikog sud sa ilang balay sa barangay Looc, Dakbayan sa Mandaue.
Si Senior Police Officer 4 Fernando Gabutero sa Presinto 5 sa Mandaue City Police Office (MCPO) miila sa namatay nga mao si Rod Jade Omolon.
Matud pa ni Gabutero nga ang amahan sa namatay maoy nakadiskubre sa anak nga nagbitay na sulod sa lawak.
Ang mga sakop sa Emergency Rescue Unit Foundation (ERUF) kauban sa mga sakop sa kapolisan sa Presinto 5 maoy misuway pagsalbar kaniya apan nakabsan na kini sa kinabuhi.
Si Gabutero miingon nga sa sulod sa lawak nakaplagan ang suicide note nga gi-address ngadto sa iyang mga ginikanan ug sa uyab niini nga nakigbulag kaniya.
Matud pa ni Gabutero nagtuo ang pamilya nga way foul play sa kamatayon sa anak hinungdan nga wala na kini ipa- autopsy. - /EIM) (BANAT NEWS)