CEBU, Philippines – Nibali sa ila’ng suporta ang mga tigpaluyo ni Efrain Pelaez, Jr. ngadto kang Lapu-Lapu City Mayor Paz Radaza.
Kini human wala sila’y nakita nga isyu batok ni Radaza ug kalamboan ang nahatag niini ngadto sa dakbayan.
Matud ni Joe Ycong nga kapin sa 700 sila ka tawo ang nangampanya kang Pelaez sa niaging eleksiyon. Si Pelaez nipahibawo nga mopapili na usab sa ika-tulo’ng higayon sa pagka-mayor sunod eleksiyon.
Kapin sa 30 ka tawo, gawas ni Ycong, ang niadto sa opisina ni Radaza sa niagi’ng Miyerkules sa hapon alang sa pagpadayag sa ila’ng suporta. Nipasabot si Ycong nga angay lang sila mokampanya ni Radaza tungod kay naggunit kini og posisyon sa dakbayan samtang si Pelaez ordinaryo lang nga sakop sa Liberal Party. Sila si Radaza ug Pelaez pareho’ng nangangkon nga sakop sa LP.
Si Radaza ug Bise Mayor Marcial Ycong nipasalamat sa iya’ng bag-ong supporters sa paghatag og salig kaniya.
"Daku’ng pasalamat nako sa ila’ng pagsalig sa akoa. Sa pagkakaron, ato’ng paningkamutan nga ang tanang panginahanglan sa tawo ato’ng mahatag," dugang ni Radaza. – /GMR) (BANAT NEWS)