Gipasanginlang nangawat og baktin namusil
CEBU, Philippines - Nalandig sa tambalanan ang mag-uyoan human pamusila sa silingan nga gidudahang nangawat sa ila’ng binuhi’ng baktin sa barangay Candulawan, dakbayan sa Talisay sa niagi’ng adlaw.
Samdan si Ariel Padigos, 32, sa tuo’ng dughan ug tuo nga bukton samtang ang uyoan nga si Alan Cabaluna, 44, naigo sa iya’ng tuo nga tiil.
Ang suspek giila nga si Renato Pagtalunan alyas Boboy, hingkod ang panuigon.
Sa imbestigasyon sa kapolisan nasuta nga gikawatan og baktin ang mga biktima ug si Pagtalunan ang gipasanginlan human nakit-an ni Padigos nga naghinay-hinay sa pag-ukoy sa mga baktin niana’ng kadlawon.
Gikomprontase ni Padigos ang suspek apan nihulbot kini sa armas dayun pusil sa biktima kinsa dali nga gidala sa Cebu City Medical Center samtang ang suspek nisibat sakay sa motorsiklo kuyog sa iya’ng anak nga si Kenneth, 22.
Nakamata si Cabaluna gumikan sa kasaba ug nigukod sa suspek ug naapsan apan sa ila’ng pagkomprontase nibunot na sab sa armas si Pagtalunan ug gipusil si Cabaluna.
Ang suspek padayun sa pagsibat padulong sa barangay Tabunok.
Sa gihimo’ng follow-up operation sa kapolisan, ila’ng nadakpan si Kenneth sa ila’ng panimay apan ang amahan ang pabilin pa’ng nagtagotago. (BANAT NEWS)
- Latest
