CEBU, Philippines – Naaktohan sa kapolisan ang tulo ka tawo lakip sa usa ka minor de edad nga nag-pot session diha’ng gisusi ang nahitabo’ng pagpanglungkab sa panimalay sa ila’ng kaubang polis sa barangay Binaliw, dakbayan sa Danao pasado alas 6 sa buntag sa niaging adlaw.
Si Police Senior Officer 1 Ildefonso Prosia sa Danao City Police Station niila sa mga nadakpan nga sila si Felomino Castro, 28; Dioscoro Labador, 32 ug usa ka 16-anyos nga lalaki ug pulos nagpuyo sa maong dapit.
Matud ni Prosia nga ang team sa kapolisan nga gipangulohan ni Police Officer 3 Fiel Restauro ang naghimo og pakisusi sa nahitabo’ng pagpanglungkab sa panimalay ni PO1 Marlito Durano sa maong dapit diin gisakiyo ang 9mm pistol nga nagkantidad og P7,000 ug uban pa’ng mahinungdanong butang.
Diha’ng nagpadulong sila sa maong dapit mao’y ila’ng namatikdan ang pagpanagan sa nagpundok nga lalaki gikan sa payagpayag hinungdan nga dali nila’ng gipanggukod ug nasikop ang tulo ka tawo.
Nakuha sa duha ka dinakpan ang tagsa ka pakete’ng shabu nga gihuptan nga nagkantidad og P472 ang matag usa samtang ang minor de edad nga lalaki ilang nasakmitan og mga drug paraphernalia. – /GMR) (BANAT NEWS)