Center island sa Escario St. ipatangtang

CEBU, Philippines - Gimanduan ni Cebu City Mayor Michael Rama ang City Traffic Operations Management (CITOM) nga tangtangon ang permanent division, pagamyan ang center island ug wala nay left turn sa dalan Escario.

Matud ni Rama nga namatikdan niya ang huot sa trapiko kagahapon diha’ng siya niagi sa maong lugar.

Adunay division sa dalan Escario nga wala magtupong maong mosamot ang huot sa trapiko kay dili pareho ang gilapdon sa matag lane.

Iyang ipatangtang ang permanent division aron moluag ang trapiko sa dalan ug wagtangon ang left turn.

Alang kang Rama ang maayo’ng ihulip sa permanent division, mao ang traffic cones aron nga ibutang tunga sa dalan. Dugang niya nga makatabang ang traffic cones kay pwede ra mabalhin kun asa nga lane ang traffic.

Sugyot niya nga magbutang og U-turn slot sa Capitol Parish nga mamahimo’ng tuyokan sa mga sakyanan sulod sa simbahan.

Matud sa mayor nga dapat ang U-turn slot dili duol og eskina kay makasamot sa trapik.  (BANAT NEWS)