CEBU, Philippines - Nagkauyon sila si Mayor Johnny Delos Reyes ug Bise Mayor Romeo Villarante sa tinguha nga pagpalambo sa Talisay City Fish Port.
Bisan sa bangi sa duha ka opisyal, nagkuyog sila kauban ni City Legal Counsel Alfredo Sipalay ug mga consultants sa pagduol kang Gobernador Hilario Davide III kagahapon aron mangayo og endorsement alang sa Cebu Port Authority (CPA) nga tugutan ang siyudad nga modumala sa fish port.
Ang fish port abangan sa Asian Marine Corporation ug himuon na kini’ng pantalan sa mga commercial sea vessels.
Matud sa mga opisyal nga nagkinahanglan og P500 milyones ngadto sa P600 milyones ang development cost sa fish port ug ang nahisgutang kompaniya ang moabaga sa gasto.
Sulod sa 25 ka tuig ang kontrata sa kompaniya tali sa siyudad sa ilang pag-abang sa fish port ug renewable kini.
Matud ni Villarante nga kung itugyan na sa CPA ang pagdumala sa fish port ngadto sa siyudad gilauman nga ang Talisay makakuha og daku’ng kita tungod kay mao na kini ang mokolekta sa bayad sa mga modunggo nga barko ug ang siyudad mohatag na lang og bahin ngadto sa CPA. Gilauman nga sa sunod tuig masugdan na ang operation sa pantalan. (BANAT NEWS)