CEBU, Philippines - Ipadayon sa administrasyon ni Gob. Hilario Davide III ang pagpatuman sa housing project sa mga kawani sa Kapitolyo sa luna nga giandam sa niaging administrasyon sa barangay Tunghaan, lungsod sa Minglanilla.
Sugdan na ang survey sa maong dapit ug gitinguha nga mahuman sa buwan sa Hunyo.
Matud ni Jone Siegfred Sepe, hepe sa Provincial General Services Office, nga han-ayon nila ang mga pamaagi sa pagbayad, lakip na ang presyo ug kun kinsa ang mahimo’ng maka-benepisyo sa maong socialized housing program.
Kini ibase sa pareho’ng programa sa probinsya sa barangay Kalunasan, siyudad sa Sugbo nga gi-implementar sa niaging administrasyon.
“We will come up a guideline. We have the similar program in the previous admin located in Kalunasan. We are probably looking at copying some of the guidelines,” sigun ni Sepe.
Ang luna sa Tunghaan adunay kinatibuk-ang sukod nga 8.4 ka ektarya aron tukuran sa mga panimalay ubos sa programa sa Gawad Kalinga.
Matud ni Paul Entera, hepe sa Real Estate Division sa Kapitolyo, nga napupos na ang kasabutan sa GK ug Kapitolyo niadtong tuig 2013 ug 1.09 ektarya lang ang nagamit nga gi-okupar og 96 ka panimalay.
“Mao ang sobra nga wa nagamit i-allot sa Capitol employees for housing project,” dugang ni Entera.
Si Sepe nagkanayun nga human sa survey, iduso ang report ngadto kang Davide. (Michael Vencynth H. Braga/GMR)(BANAT NEWS)