CEBU, Philippines – Nagpakitabang sa kapolisan sa lungsod sa Compostela ang 21-anyos nga dalaga kinsa nipasangil nga gilugos sa drayber sa traysikol nga iyang gisakyan paingon sa iyang trabaho niadtong kadlawon sa Domingo.
Matud ni SPO3 Pedro Enriquez, desk officer sa Compostela Police Station, nga lumad nga taga Mindanao ang biktima ug kasamtangan nga nagpuyo sa dakbayan sa Danao. Ang biktima nipasangil tungatunga sa ilang biyahe, kalit lang nihunong ang drayber dapit sa gawsanan sa merkado nga ilang gigikanan ug may lain nga lalaki nga nisakay ug gitabonan sa T-shirt ang nawong sa biktima dayun tion og kutsilyo ug nihulga nga dunggabon kung mosinggit.
Ang biktima giingong gibinaklid pa ug gigapos sa suspek.
xx Giingong gidala dapit sa barangay Magay sa lungsod sa Compostela ang biktima ug didto gipahimuslan sa lalaki nga kauban sa drayber ug wala na makasukol.
Ang drayber misuway sab unta og lugos apan napatiran sa biktima hinungdan nga wala nadayun.
Human sa hitabo gisakay og balik sa traysikol ang biktima ug gibalik sa dakbayan sa Danao ug matud pa iyang nadunggan nga nagplano ang drayber nga siya patyon.
Nakahigayun paglayat ang biktima ug nitago sa kasagbutan nga bahin sa lugar.
Buntag na sa adlaw nga Domingo nitaho sa ilang buhatan ang biktima kuyog ang mga sakop sa Special Weapon and Tactics sa dakbayan sa Danao.
Nagpadayun ang kapolisan sa Compostela ug dakbayan sa Danao sa pagpangita sa mga responsabli apan ang biktima wala makatimaan sa plate number sa traysikol. – /GMR) (BANAT NEWS)