CEBU, Philippines - Ang ikatulo nga labing taas nga opisyal sa kapolisan dinhi sa Central Visayas maoy gitudlo nga acting director sa Cebu City Police Office (CCPO) hulip ni Senior Superintendent Noli Romana.
Si Senior Superintendent Condrado Capa , deputy regional director for operations sa Police Regional Office (PRO) 7, gimandoan nga mangulo sa CCPO samtang ang Camp Crame wala pa makatudlo og permanent direktor.
Si PRO-7 regional director Prudencio Tom Bañas mao mismo ang mipahibalo nga si Capa maoy gipalingkod niya pagka acting direktor sa kapolisan sa dakbayan sa Sugbo.
Miadto sa City Hall si Romana ug mipasabot ni Mayor Michael Rama nga alang sa iyang kaayohan ang pagbalhin didto sa Camp Crame aron nga matudlo siya og puwesto nga makapahimo kaniya nga heneral.
Si Rama wala na moreklamo nga gihulipan sa Camp Crame si Romana, ang opisyal nga iyang gipili human siya midaog pagka mayor sa ikaduha nga termino. (BANAT NEWS)